Chapter II: Part 2

In this yere aboughte the feste of Natyvyte of seynt John Baptiste, David the brother of Thlewelyn was taken and holden in pryson at Rothelan, unto the fest of seynt Mighell, and thanne lad to Schrovesbury, and there he was dampned to be ded; and first he was drawen thorugh the citee with hors unto the galowes, thanne hanged, and afterward beheded; and thanne his bowels brent, and the laste his bodye quarterd in iiij quarters, whiche were sent to be sett up in iiij parties in Engelond; and be the kyng comaunded that his hede schulde be seete on the tour of London. And fro that tyme forth the kyng occupied alle the lond of Walys. And thanne he dyvyded it into schires and hundredys, in maner as it is in Engelond; and at Abbercouewe[15] he made a gret and a strong castell, fro whiche place the monkes of Cisteux remeved; and in another place a mancion edified for them. He made there a fair toun, and he lete make the castell of Carnarvan in Snowdon, where that his sone was born: and also he lete make the castell of Plaupautuvouc.[16] And also in this yere Petir kyng of Aragon occupyed the kyndom of Cecilie, ant putte out kyng Charles, whiche anon after mad an ende of hys lyf; wherfore the pope Martyn accursed the said Petir, and the kyngdom of Aragon he yaf to the kynges sone of Fraunce. And in this yere aroos werre betwen the kyng of Fraunce and the kyng of Spayne; and the kyng of Fraunce with a gret ooste wente into Spayne, whiche dede nothyng worthy to be preysed. Also in this yere Reynold of Lanfare,[17] Robert Pynot, Poule of Stebenhithe, Thomas Corewener, John Tholosan, Thomas Russell, and Robert Scot, weren accused of the deth of Laur' Doket, whiche was hongen in Bowe chirche: and they were dampned, drawe, and hanged; and on Alyce a woman was brent for the same cause: and Rauf Crepyn, Jordan Goodcheppe, Gilbert Clerk, and Geffrey Clerk, weren atteynt and sent to prison into the tour of London. Also in this yere the grete conduyt in Chepe was newe begonne to maken.

[Footnote 15: _Corrected from the Cotton MS._]

[Footnote 16: "Lambatre vanc, and otherwise it is called Abrestewith" _in the Cotton MS._]

[Footnote 17: "Lancastre" _in the Cotton MS._]

REX EDWARDUS PRIMUS. [1284-1287.]

Id'm maior[18] usq' Stephanus Cornhull. A^{o}. xiij^{o}.
f'm ap'lor' Petri Rob^{t}. Rokesley.
et Pauli.

[Footnote 18: "Gregorie Rokesley p' p'te anni" _in the Cotton MS._]

[Sidenote: The fraunchise of London is sesed into the kynges hond.]

[Sidenote: Edward the kynges sone was born.]

This yere upon seynt Petyr day and Poule the fraunchise of London was sesed into the kynges hand; forasmoche as Gregory Rokesby maire yelde up the seal at Berkynge chirche, and toke it to Rauf Asshewy; and thanne was Rauf Sandwych mad wardeyn of the citee. And in this yere the kyng of Fraunce wente into Aragon with a gret powere. Also in this yere Edward the kynges son was borne.[19] And the kyng dwelled in Walys tyl ayens Cristemasse, and he held his Cristemasse at Bristoll.

[Footnote 19: "at Carnarvon" _in the Cotton MS._]

Rauf Sandwyche, custos, drap'. Walt' Blount. A^{o}. xiiij^{mo}.
Joh'es Wade.

[Sidenote: Additamenta Glouc'.]

This yere kyng Philipp of Fraunce com out of Aragon, where he loste the most part of his oost, and deyde: and Philipp his sone was crowned kyng in the feste of the Epithanie. And in this yere deyde kyng Petyr of Aragon. Also in this yere, in the feste of the Nativite of oure lady, S^{r}. Edmond Mortymer receyved the ordre of knyghthod of kyng Edward at Wynchestre. Also, this seid S^{r}. Edmond wedded Margarete the doughter of Sire William de Fowles,[20] cosyn to the quene, at London. And in this yere were mad at London, the statutes whiche ben seid additamenta Glouc'.

[Footnote 20: "Fenles" _in the Cotton MS._]

John Breton, wardeyn. Thomas Cros. A^{o}. xv^{o}.
Will' Hauteyne.

[Sidenote: Alle the Jewes of Ingelond were put to a gret tribute.]

[Sidenote: To hym was rendred certeyn lond.]

[Sidenote: Grete haylstones.]

In this yere, alle the Jewes of Engelond were put to a gret tribute, to be payed to the kyng. Also this yere the kyng passed the see into Fraunce, aboughte the Invencion of the Holy Cross; and of the kyng of Fraunce he was worthyly resceyved, and so yorned a certeyn time with the kyng of Fraunce at Parys, whiche yald up certeyn londes of Gascoigne to the kyng Edward, whiche long tyme hadde wrongfully be withholden out of his handes. Also in this yere, in the March of Walys fel the grettest hailstones that evere were seyn in that countre, whiche dede grete harme to beestes and to houses and to corn.

REX EDWARDUS PRIMUS. [1287-1290.]

Rauf Sandwych, custos. Will' Hereford. A^{o}. xvj^{o}.
Thomas Staunes.

This yere seynt Thomas of Hereford was translatyd. Also, aboughte Pentecost, Rys ap Geredith began partie ayeyns the kynges pees, and werred in the kynges londes.

Id'm custos. Will'm Beteyne. A^{o}. xvij^{mo}.
John Caunterbury.

[Sidenote: A q're whete at xvj _d._]

This yere was so gret plente of whete that men solden a quarter of whete for xvj^{d}. And in this yere was a passyng hoot sommer, and specially in hervest.

Id'm custos. Fulco de S'c'o Ed'o. A^{o}. xviij^{o}.
Salamon Langford.

This yere kyng Edward cam out of Gascoigne into Engelond upon oure lady day, the Assumpcion. And in this yere S^{r}. Thomas Weylond justice, Adam of Skretton, and alle moost alle other justices were convicte of false domes yevynge, and grevously punysched; some of lesyng and forfaityng of alle there goodes, and some be redempcion of moche money.

REX EDWARDUS PRIMUS. [1290-1292.]

Id'm custos. Thomas Romayn. A^{o}. xix^{o}.
Will'm Leyre.

[Sidenote: Alle the Jewes were exiled out of Engelond.]

[Sidenote: The v^{th} of ther moveable goodes.]

[Sidenote: Obiit regina Elianora.]

[Sidenote: The staple of wolles was ordeyned at Sandwych.]

In this yere alle the Jewes were exiled out of Engelond, to voyde the reaume of Engelond be Alhawen tyme, upon peyne of lesynge of there heedes or eny of them mighte be founden withinne the reaume; and for to have this graunted of the kyng don and performed, the co'es of the reaume grauntyd for to yeve the kyng the V parte of there moveable goodes. This same yere Gilbert the erle of Gloucestre wedded dame Johanne the kynges doughter. And in this yere forthwith the dukes sone of Braban wedded dame Margrete the kynges other doughter. And in this yere, on seynt Andrew even, deyde quene Elianore kyng Edward wyf. Also in this yere aroos a grete stryf betwen the V Portus and Flaundres. Also this yere the kyng ordeyned the newe feyre and market at Sandewych, where alle the wolles of Engelond schal be brought, and there sold.

Id'm custos. Rauf Blount. Anno xx^{mo}.
Hamond Box.

In this yere Acres was wonne of the Sarasynes the xv day of Maii, and utterly destroid, and alle tho that dwelden withinne that myghte be founden were sclayn. Natheles manye escapid awey be schippes. Also quene Elianore the kynges modyr deyde. And in this yere the kyng prisoned his sone for mayntenaunce of diverses traitoures.

REX EDWARDUS PRIMUS. [1292-1294.]

Id'm custos. Herry Bele. Anno xxj^{mo}.
Ely Russel, drap'.

[Sidenote: mors.]

[Sidenote: mors.]

[Sidenote: mors.]

In this yere the kyng of Scotlond come to the kynges parlement to London. Also that type iij men token away too prisoners fro Baskle seriaunt of London; wherfore the ryghte handes of the same iij men weren smyten of at the Standard in Chepe. Also in this yere, iiij nonas April, deyde pope Nicholas. Also in this yere deyde S^{r}. Robert Burnell bysshop of Bathe, and thanne chaunceler of Engelond. Also in this yere frere John Pecche erchebysshop of Caunterbury deyde. And in this same yere anon after Whitsonday, the justices of eyr saten at Hereford. And in this yere anon after the feste of seynt Michel, they saten at Schrowesbury.

Id'm custos.[21] Robert Rokesley the younger. A^{o}. xxij^{do}.
Martyn Ambresbury.

[Footnote 21: "Raffe Sandwich custos pro p'te anni" _in the Cotton MS._]

[Sidenote: A gret snowe.]

In this yere fel the grettest snowe that evere was seyn before this tyme; wherfore a vercyfyer made in metre thise vers:

[Sidenote: v's'.]

_"C'stino tiburci s'c'or' Valariani
Nix cadit innanis vent' vehemens Borial'
Emulsit silvas ussit quas rep'it herbas
Edes dampnose detexit et impetuose
Quas clam p'stravit sic plurima dampna patravit."_

[Sidenote: A weddyng.]

And in this yere the erle of Barre wedded dame Elianore the kynges doughter at Bristoll, aboughte the Exaltacion of the Holy Crosse.

REX EDWARDUS PRIMUS. [1294-1296.]

Sire John Bryton, knyght, custos. Ric' Glouc'. A^{o}. xxiij^{cio}.
Herry Box.

[Sidenote: A gret rysyng in Walys.]

[Sidenote: The Normanes arryved at Dovorre.]

In this yere was a gret rysyng in Walys, wherfore the kyng wente into Walys and made pees and reeste. Also the townes of Bloy and Bayone werre wonne be S^{r}. John Seynt John and other worschepful bachelers of Engelond. Also the same yere the Normaunes arryved at Dovorre and brent a gret part of the towun and martyred an holy man that was clepyd Seynt Thomas of Dovorre: but the Normaunes were sclayn every modir sone, ther eschapid none. Also in this yere the kyng was defraunded of his lond in Gascoigne in this manner, sothly: the kyng hadde yoven the forseyd lond of Gascoyne to the kynges suster of Fraunce, for that sche schulde be yoyned to hym in fre mariage, and be some of his counseill enfeffed here in the sayd lond of Gascoigne; whiche lond of Gascoigne sche yaf to Charles here brother and to other, and the matrymoigne betwen here and kyng Edward sche sette at noughte, and wolde noughte stonden therto. Wherfore kyng Edward sente hyse ambassatours to the kyng of Almaigne, Spayne, and of Aragon, and to manye other dukes and erles beyonde the see, preyenge and askynge counseill and helpe of the seid matier: of whiche some because of affynyte and for yeftes yeven, and some for good and faire beheste of yeftes, graunted the kyng his axynge.

Id'm custos. John Dunstable. A^{o}. xxiiij^{to}.
Adam Halyngbery.

[Sidenote: Alle the wolles and felles of Engelond arested.]

[Sidenote: The clergye of Engelond graunted moche good to the kyng for his werres.]

[Sidenote: And the lay peple graunted the x p't of there goodes.]

[Sidenote: xxv m^{l} and viii^{c} Scotts.]

[Sidenote: The kyng tok the castell of Edenburgh with alle the regalies of Scotlond.]

In this yere the kyng lete areste alle the wolles of Engelond, wolle felles and hydes; and he tok to hym alle the money to hym graunted of the pope in subsidie of the holy lond, and collecto's[22] of the same dysme thorugh Engelond, and he dede for to be born to London into his Eschequer: also the convocacion of the clergye of alle Engelond beynge at London the Wednesday nest after the fest of seynt Mathy, the kyng asked a gret some of the clergye toward his werres whiche he hadde with diverses regiones and provynces; and the clergye graunted hym halven dele there goodes sp'uelx and temp'elx, oughtake benefices not passynge x marc: and the said taske the kyng let gadere at iij tymes evenly of the yere. Also in this yere[23] the kyng hadde of lay peple of Engelond the x part of there goodes, whiche he let gadere at two tymes of the yere be even porcions. The same yere the werre aroos betwen the kyng and the Walssh peple, in whiche werre was sclayn greet multitude of peple: and that werre began aboughte the feste of seynt Cosine and Damyan. And in this yere a worthy marchaund callyd Laurence of Lodolowe was dreynt in the see to Flaundres ward. Also in this yere S^{r}. Thomas Turbevyle for treson was drawen and hanged. And in this yere Sire John Seynt John discomfyted the erle of Artoys; but in the seconde bataile the said S^{r}. John was taken and enprisoned in Fraunce. And in this yere S^{r}. Herry Mortymer resceyved the ordre of knyghthoode at Portesmouth. Also this same yere the kyng Edward, magre alle the Scottes of Scotlond, he toke the toun and the castell of Berewyk, and killed there xxv m^{l} and viij c Scottes; and there were taken S^{r}. William Douglas, S^{r}. Symond Freshell, and the erle Patryke. And in this yere, that is to sey the yere of oure lord a m^{l}cclxxxxvij, the kyng tok the castell of Edenburgh, where he fond the regalyes of Scotlond, that is to seye the kynges see, his crowne of gold, and his ceptre, whiche regalyes the kyng offred sithens to seynt Edward at Westm', in the morwe after seynt Bothulphes day: and at Myssomer, John Bailhol kyng of Scotlond come to the kynges pees to London. Also this yere Edward the kynges sone was admirall upon the see.

[Footnote 22: "Of the collectours" _in the Cotton MS._]

[Footnote 23: _See note_ F.]

REX EDWARDUS PRIMUS. [1296-1297.]

Id'm custos. Thomas Suffolk. A^{o}. xxv^{to}.
Adam Fulham, drap'.

[Sidenote: The kyng lete gadere in Engelond cm^{l} quart' of corn for to send to Gascoigne.]

This yere the kyng lete gadere in Engelond in diverses schires an hundred thousand quarters of corn, and sente it over the see into Gascoigne: and the kyng passed the see in August, and with hym xx^{ti} m^{l}[24] Walsh men and too m^{l} Englysshmen and too m^{l} Irysshmen; and there aroos a stryf betwen the kyng and his lordes, that non of them wolde passen with hym over the see; and the kyng arryved in Flaundres: and there was taken trewes for too yere betwen kyng Edward and kyng Philipp of Fraunce; and S^{r}. John Seynt John and other prysoners were frely delyvered out of pryson.

[Footnote 24: "xxx thousand" _in the Cotton MS._]

Id'm custos. Will'm Stortford. Anno xxvj^{to}.
John Stortford.

[Sidenote: Certeyn men were arested for brekyng of the toune of Cornhull.]

In this yere, in the feste of seynt Andrew, the kyng graunted to the lordes all there axynge of the poyntes of the olde chartre: also the Scottes areysed werre ayeyns the kyng of Engelond: also the viij day of Paske, Thomas Romayn, Richard Romayn,[25] Richard Gloucestre, Nicholl Faryndon, Adam Halyngbery, Thomas Cely, John Dunstale, Richard Asshwy, John Wade and William Storteford, weren aresteed for brekyng of the toune in Cornhull. And in the viij day of May[26] in this yere the kyng faught with the Scottes at Fowkyrk, in which bataile xxiij m^{l}[27] Scottes were sclayn, and of Englysshmen but xxviij, honoured be the highe Godes grace.

[Footnote 25: _Omitted in the Cotton MS._]

[Footnote 26: "The day of Marie Mawdelyne" _in the Cotton MS._]

[Footnote 27: "xxx m^{l}"--_Ibid._]

REX EDWARDUS PRIMUS. [1298-1300.]

Herry Wallys, maior. Ric' Sop'lane. Anno xxvij^{o}.
Thomas Cely.

[Sidenote: The fraunchise of London was graunted ayeyn.]

[Sidenote: A maryage betwen the kyng and Margarete the kynges sust' of Fraunce.]

[Sidenote: He wan all Scotland.]

This same yere the fraunchise of London was graunted ayeyn for ij m^{l} marc, whiche was sesed ayeyn into the kynges hond; and for to make leve of that some, the servauntes bowys in the citee were sette at the tallage as well as the maistres. Also in this yere men of London wenten and sercheden the chirche of Seynt Martyns in the feld for tresoure of gold, thorough the wordes of a gardyn', whiche seyde how there was a gold hord; but they founde nought: wherfore the dene of Poules of London, be comaundement of the erchebysshop of Caunterbury, denounced them alle accursed openly at the Crosse of Poules that sergeden as above seyd. Also in this yere Robert Wynchelsee erchebysshop of Caunterbury spoused the kyng Edward and Margarete the kynges suster of Fraunce togidere: and also pees was mad betwen bothe kynges. And in this yere the kyng wente the thridde tyme beyounde the see into Scotlond, and thanne wan it alle.

Ely Russell, maior. Henry Fyngreth. A^{o}. xxviij^{o}.
John Armentires.

[Sidenote: The Traylbaston.]

[Sidenote: And this yere quene Margarete com into Engelond.]

[Sidenote: The kyng enprysoned his sone Edward.]

This yere come the kyng to London and ordeyned the Trailbaston, whiche wente thorough the reaume, and arrered therby moche tresour. And in this yere the quene Margarete com into Engelond; and the citeizens of London reden ageine here in good aray, abought cc persones atte the leeste. Also this yere the kyng enprysoned his sone Edward, because that Waulter Langeton bysshop of Chestre hadde compleyned that the forsaid Edward, be counseill of Pers of Gavaston, esquyer of Gascoigne, hadde broken his parkes; and forasmoche as the said Edward the kynges sone was ladde and governed be the said Pers, the kyng dede exile the forseid Piers for evere.

REX EDWARDUS PRIMUS. [1300-1304.]

Id'm maior. Lucas Hav'yng. Anno xxix^{mo}.
Ric' Champenes.

John Blount, drap', Rob't Gallere. A^{o}. xxx^{mo}.
maior. Pet' Bosynho.

[Sidenote: A parlement at Caunterbury.]

In this yere the kyng held his parlement at Caunterbury, and the werre aroos betwen the kyng of Fraunce and of Flemynges.

Id'm maior. Herry Pourte. Anno xxxj^{mo}.
Simon Parys.

Id'm maior. Will' Combemartyn. A^{o}. xxxij^{do}.
John Burford.

[Sidenote: The templers were stroid.]

This same yere, that is for to seye the yere of oure lord a m^{l}cccv, were alle the Templers distroyd in oo day thorugh out alle Cristendome.

REX EDWARDUS PRIMUS. [1304-1307.]

Id'm maior. Rog' Parys. A^{o}. xxxiij^{cio}.
John Lyncoln.

[Sidenote: A parlement at Westm'.]

[Sidenote: R. le Bruz.]

In this yere William Waleys, that was sworne liege man to the kyng of Engelond, presented hymselfe to be kyng of Scotlond, and rebelled ayens kyng Edward: nevertheles he was taken and sent to London, where he was dampned, drawen, and hanged and beheded, and his bowels brent and the body quarterd; and his hede sette upon London brigg, and hys foure quarters sent into the foure beste townes in Scotlond: and this was don upon seynt Bertilmewes even. And in the fest of seynt Myghell the kyng held his parlement at Westm'; to the whiche parlement come ought of Scotlond the bysshop of seynt Andrew, Robert le Bruz erle of Caryk, Simon Frysell, and John erle of Athelles, whiche weren sworne to be trewe lieges to kyng Edward.

Id'm maior. Reg'lus Underley. Anno xxxiiij^{to}.
William Cosyn.

[Sidenote: Roberte le Bruz.]

[Sidenote: Bysshoppe of Boston.]

[Sidenote: Bisshoppe of Burdeux made pope.]

This yere Robert Bruz made hym kyng of Scotlond, and S^{r}. John Comyn was sclayn atte Grey Freres in Donfres, because he wolde not falsen his othe that he made to kyng Edward; wherefore the kyng sente after alle the bachellarye of Engelond that thei schulde comen to Westm' at Whitsontyd thanne nest folwyng; and there he doubbed cclxxx knyghtes: and the Fryday[28] nest before the assumpcion of oure lady, the kyng mette with Robert le Bruz be syde seynt Jones towne, and killed of his meyne vij m^{l}; and Robert le Bruz fledde: and Simond Frissell was take, and on oure lady even the Nativite he was drawen and hanged at London, and beheded. And in the forsaid bataille were taken the bysshop of Boston, the bysshop of seynt Andrewes, the abbot of Stone, alle armed, whom the kyng sente to the pope, to do with them what he wolde. Also S^{r}. John the erle of Athelles was taken also at the same bataille; and at the request of the quene, because he claymed kynrede of kyng Edward, his drawynge was relesed; nevertheles he was honged and his body brent alle to asshes. And also in this yere the erchebysshop of Burdeux was mad pope.

[Footnote 28: "the iiij^{th} day" _in the Cotton MS._]

Id'm maior, drap'. Simon Benet. A^{o}. xxxv^{to}.
Geffray atte Conduyt.

In this yere deyde the noble and most doughted prynce kyng Edward the firste, in the day of translacion of seynt Thomas of Caunterbury, whos body lith worthyly entered at Westm'.

[Transcriber's Note: Edward I actually died in 1307, the 36th year of his reign.]

* * * * *

NOMI'A MAIOR' ET VICECOMITU' LONDON' TEMPORE REG' EDWARDI SECUNDI DE CARNARVAN', QUI CORONATUS FUIT APUD WESTM' X^{mo} KAL' MARCII[29] ANNO D'NI MILL'MO CCC^{mo} vij^{o}.

[Footnote 29: "xiiij Kalend' Decembris" _in the Cotton MS._]

REX EDWARDUS SECUNDUS. [1307-1308.]

John Blount, maior. Will'o Furneys. A^{o}. p'mo.
Nygel Drury.

[Sidenote: Kyng Edward wedded the kynges doughter of Fraunce, Isabell.]

This yere the kyng Edward wente into Fraunce and wedded Isabell the kynges doughter of Fraunce, the xv day of Januer', in oure lady chirche at Boloigne; and the xx day Fever' sche was crowned at Westm': and there was so gret prees of peple that S^{r}. John Bakwell was crowsed to the deth. Also in the same yere the kyng anon after the deth of his fadir sente into Gascoigne for Pers of Gavaston; and he yaf hym the lordschipe of Walyngford and the erledom of Cornuwayle: and this same yere prophecyed the chanon of Bridlyngton.

REX EDWARDUS SECUNDUS. [1308-1312.]

Nicholl Faryndone, William Basyng. A^{o}. s'c'do.
goldsmyth, m'. Pers Blakeney.[30]

[Footnote 30: _See note_ G.]

Thomas Romayn, m'. Simon Merewode.[31] A^{o}. t'cio.
Ric' Willeford.[32]

[Footnote 31: _See note_ G.]

[Footnote 32: _See note_ G.]

[Sidenote: Templers were distroyd.]

[Sidenote: The ordre of the Crowched Freres began.]

In this yere the schirreves of London paid for the accomptes of London and Middlesex cccc^{li}. Also in this yere, that is to seye the yere of oure lord a m^{l} ccc^{mo} x^{mo}, the ordre of Templers were distroid on oo day thorugh alle Cristendome, whiche ordre began in the yere of oure lord a m^{l} lxxxxviij. Also in the same yere began the ordre of Paulyns, that is to say Crowched Freres.

Ric' Reff'm, m'. Simon Crop. A^{o}. iiij^{to}.
Petir Blakeney, drap'.

John Gysors, m'. Roger Palmere.[33] A^{o}. v^{to}.
Jacob Seynt Ed'ust.[34]

[Footnote 33: _See note_ H.]

[Footnote 34: _See note_ H.]

[Sidenote: Edward of Wyndesore was born.]

In this yere was borne the kynges sone Edward at Windesore.

REX EDWARDUS SECUNDUS. [1312-1315.]

Id'm maior. John Lambyn. A^{o}. vj^{to}.
Ric' Lucekyn.[35]

[Footnote 35: "Bitekyn" _in the Cotton MS._]

Nicholl Faryndon, m'. Adam Burden. A^{o}. vij^{o}.
goldsmyth. Hugo Garton.

This yere of oure lord a m^{l} cccxiiij the kyng Edward with a ryall oost wente into Scotlond; and upon Missomer day faught with the Scottes at Strywelyn; and there he was discomfited and fledde, and moche of his peple sclayn.

John Gysors, m'. Stephen Abyndon. A^{o}. viij^{o}.
William Bedyngham.

In this yere it befell that there was a rebaude called John Tannere, the whiche wente aboughte and seyde that he was the goode kyng Edward sone, and called hymself kyng Edward of Carnarvan, and seide thorugh necligence of his noryce, whil he lay in his cradel a sowe com in and foule rente hym, and the noryce durste nought tellen it, but toke a tannere sone[36] and kepte hym in hys stede, and so he was putt to kepyng of another noryce, be whiche he was preved of his rewme: and for to make this the more certeyne to be belevyd, he schewed the places of the woundes which that he seyde the sowe hadde mad. And he seyde that kyng Edward maners were acordyng with the maners of his fadyr the water-berere,[37] for as moche as he loved swyche rude werkes: and for this seyenge moche peple yaf credence to hym and leved his wordes. Also the same John Tanner chalangyd the chirche of the Frere Cannes at Oxenford, whiche was somtyme the kynges halle, and kyng Edward hadde yeve it to them to make thereof there chirche. But natheles at the last he was preved fals, and was taken and brought to Northampton, and there he was drawen and hanged; and before that he was put to his penaunce he confessed before the peple that the devell be hyghte hym that he schulde be kyng of Engelond, and knowloched that he hadde served the devell iij yere and more.

[Footnote 36: "A carter son" _in the Cotton MS._]

[Footnote 37: "The carter." _Ibid._]

REX EDWARDUS SECUNDUS. [1315-1317.]

Step'us Abyndon, Hamo Goodchepe. A^{o}. ix^{o}.
drap', m'. William Golith.[38]

[Footnote 38: "William Bedyngton" _in the Cotton MS._]

[Sidenote: The toune and the castell of Berewyk was lost thorugh treson.]

[Sidenote: Too cardenals comen into Engelond to make pees.]

The same yere, that is to sey the yere of oure lord a m^{l}cccxvj, upon Midlentyne Soneday, the toun and the castell of Berewyk was lost thorugh treson of Piers of Spaldyng, thanne beynge kepere of the same toun and castell. In this yere too cardenales comen into Engelond for to make pees betwen Engelond and Scotlond, whiche weren robbed upon the more of Wygelysdon; of whiche robbery S^{r}. Robert of Middelton was ateynt, and jugged to be drawe an hanged and beheded at London, and his hede sett up at Neugate; and hise quarters were sent to iiij principale citees of Engelond. And in this yere was an orible moreyn of beestes.

John Wyng've, m'. William Causton. A^{o}. x^{mo}.
Rauf Balmere.

[Sidenote: A gret derthe of corn and othere vitailes.]

This yere was a gret derthe of corn and other vitailes, for a busshell of whete was worth v_s_: and the poure peple eten for hunger cattes and hors and houndes; and too yere and an half a quarter of whete was worth ii marc; and the poure peple stal children and eten them, and thanne anon after there fille a gret pestilence among the peple.

REX EDWARDUS SECUNDUS. [1317-1321.]

Id'm maior. John Prions. Anno xj^{mo}.
William Furneux.

[Sidenote: The Scottes come into Engelond and distroyde Northumb'.]

This yere the Scottes comen into Engelond and distroyden Northumbr': and the citee of London sente to Yorke cc men of armes; and Scotlond was entyrdyted.

Id'm maior. John Pulteney. Anno xij^{o}.
John Dallyng.

[Sidenote: A parlement at Yorke.]

This yere the kyng held his parlement at Yorke; and S^{r}. Hugh Spencer[39] was mad chaumberleyn of Engelond. And in this yere was Thomas the erle of Lancastre beheded.

[Footnote 39: "Sir Hugh Spencer son" _in the Cotton MS._]

Hamo Chikell, m'.[40] Simon Abyndon.[41] A^{o}. xiij^{mo}.
John Preston.[42]

[Footnote 40: _See note_ I.]

[Footnote 41: _See note_ I.]

[Footnote 42: _See note_ I.]

This yere were the Spencers bothe the fadyr and the sone exiled out of Engelond; after they were ayeyne revoked be the kyng.

Nycholl Faryndon, m'. William Prodhom.[44] A^{o}. xiiij^{mo}.
goldsmythe.[43] Arnold Conduyt.[45]

[Footnote 43: _See note_ I.]

[Footnote 44: _See note_ I.]

[Footnote 45: _See note_ I.]

[Sidenote: The rysynge of erles and barons of this land.]

This yere of oure lord a m^{l}cccxxj was strongly the barouns werre; and Thomas erle of Lancastre the xij kal' of Aprill was beheded. And in this yere was the rysynge of the erles and barons of this lond; and they token S^{r}. Piers of Gaveston, the kynges sworn brother, and smot of his hed; for which the kyng afterward in oo day dede do beheded xx/iiij lordes and gentyles for the deth of the seid Piers.

REX EDWARDUS SECUNDUS. [1321-1323.]

Hamo Chikewell, m'. Ric' Constantyn. A^{o}. xv^{o}.
drap'. Ric' of Hakeney.

[Sidenote: The sonne was turned into blod.]

In this yere of oure lord a m^{l}cccxxij, the laste day of Octobre, the sonne was turned into blod, and so endured fro the morwe of the day unto xj of the belle[46] befor noon.

[Footnote 46: "of the Belle of the mydday" _in the Cotton MS._]

Id'm maior. John Grantham. Anno xvj^{o}.
Rog' of Ely.

[Sidenote: The vi^{th} peny of moveables.]

[Sidenote: An ordynance what the kynges offycers schulde taken in every degre.]

This same yere the kyng hadde the syxte peny of moebles goodes thorugh out Engelond. Also in this yere in the monthe of Juyne, forasmoche as the officers of the kynges houshold have ben alwey behynden, and in no certeynte of that they ought to don, nor in no certeyn what thei schulde taken of the kyng be resone of there offices, whereof examination of the saide offices ne myghte not be done, ne the officers charged as they oughte to ben, to gret damage and dishonor to the kyng, and the governaunce of his houshold not wel disposed, the kyng havynge reward to the state above seyd, and hise goodes in other manner dispendid thanne they oughte, comaunded Sire Bertilmewe Badlesmere styward of his houshold, Sire Hugh Spencer chamberleyn, Sire Roger of Norbury tresorer, and Sire Gilbert of Wyghton countroller, that thei schulde ordeyne thereupon remedie; whiche be the vertu of the kynges comaundement, ordeyned alle manere officers of houshold, and what service every officer schulde have, and what every officer schulde take, and what servaunts every officer schulde have, and what the servaunts schulde take: and whan alle the ordinaunce was made and rad before the kyng in presence of the worschipfull fadres William Milton erchebysshop of Yorke, Maistre Walter Stapilton bysshop of Excestre, the bysshop of Ely chaunceler of Engelond, the bishopp of Norwych, the bysshop of Salisbury, Sire Herry le Scrop, Sire Herry Sprignell, justices, it was assentyd and contentyd perpetuelly to be observed.

REX EDWARDUS SECUNDUS. [1323-1325.]

Nicholl Faryndon, m'. Adam Salesbury. Anno xvij^{o}.
goldsmyth. John Oxenford.

This yere the quene wente into Fraunce; and after wente S^{r}. Edward the kynges sone to his modir into Fraunce; and the kyng of Fraunce made hym duke of Guyon: wherfore kyng Edward was wroth with quene Isabell his wyf, and with Edward hys sone; and thorugh counseill of the Spensers the kyng dede exile the quene his wyf and Edward his sone, and tok into hys handes alle there landes and lordschippes that they hadden in Engelond.

Hamo Chikewell, m'. Benet Fulham. Anno xviij^{o}.
drap'. John de Causton.

[Sidenote: A mariage betwen the kynges sone Edward and the erles dought' of Henowde.]

In this yere quene Isabell and Edward hire sone beynge in Fraunce, and knowyng the malyce of the kyng, thorugh entisement of the Spensers, sente for the lordes and gentiles that were exiled out of Engelond for Thomas cause of Lancastre, that is to sey, S^{r}. Roger Mortymer, S^{r}. William Trussell, S^{r}. John Cromwell, and manye othere, whiche alle togideres ordeyned to make a maryage betwen Edward the kynges sone and the erles doughter of Henowde. And whan that maryage was acorded to be mad, the erle of Henawde graunted to quene Isabell and to Edward here sone, and to othere lordes of there companye, to brynge them with strong pouere into Englond. And whanne tydynges thereof comen to the kyng Edward, he and the Spensers made moche sorwe, and ordeyned to kepe the see cost, and withstanden them that they schulde nought londen. And at the fest of the decollacion of seynt John Baptyst, the citezeins of London sente to the kyng to Porchestre an C men of armes: and the kyng lete do crye thorugh every good market of Engelond, that whoso myghte take S^{r}. Roger Mortymer, he schulde have an c^{li} for his trawaile. And the Wednesday nest before the fest of seynt Mighell, whiche was thanne the Monday, the quene and Edward hire sone, Sire Roger Mortymer, the erles brother of Henawde, and othere grete in there companye, arryved at Orewelle in Essex, faste be Herewych: and whanne they were landed the contre alle aboughte fel to them be there owne fre wylle. And the quene and S^{r}. Edward hire sone senten a lettre to the maire and the comonalte of London, requyryng them that they schulde be helpynge to them in the quarell and cause that the quene and Edward hire sone, heir of the ream of Engelond, hadde begonne; that is for to seye, for to distroye the traytours and enemyes of the sayd reaume. But non ansuere was sente ayeyne, for doughte of the kyng and of the too Spensers, the fadyr and the sone, at that tyme weren in the citee of London, with manye othere lordes with them. And forasmoche as non answere was sent ayeyn fro the meire and the comons of London of the said lettre, the quene and Edward here sone senten another lettre therupon, with hangynge seall, to the citee of London, whiche lettre, in the dawnyng of the day was takked upon the newe crosse in Chepe; and manye copies of the same lettre were takked upon wyndous, dores, and othere open places in the citee of London, that alle men myghte rede them that wenten be the weye: and this was done on seynt Denys day, that is to seye the ix day of Octobre.[47] And as the kyng was at his mete, tydynges comen to hym therof: and anoon the kyng, the Spensers bothe the fadir and the sone, the erle of Arundell, and maister Walter Baldok, fledden into Walys; and the kyng lefte maister Walter Stapilton bisshop of Excestre to have the governaunce of the citee of London; whiche bysshop axed to have the keyes and governaunce of the citee be vertu of the comission: where thorugh debate aroos betwen hym and the citee, so that he was taken and lad to the standard in Chepe, and his hede was there smyten of, and his hede sette in his right hand: and too of hyse squyers were beheded the same tyme, that is to sey the xiiij day of Octobre, the yere of oure lord a m^{l}cccxxvj^{ti}.

[Footnote 47: _See note_ K.]

REX EDWARDUS SECUNDUS. [1325-1326.]

Id'm maior p' p'te a' Gilbert Moredon. A^{o}. xix^{o}.
Ric' Beteyn p' residuo. John Cotton.

In this yere the kyng and bothe Spensers, Robert Baldok chaunceler, and the erle of Arundell, were taken in the hilles of Walys, and the kyng was put into sauf warde; but S^{r}. Hugh Spenser wolde never after that he was taken eten mete, wherfore at Hereford he was drawen, hanged, beheded and quartered: and then was the sone of S^{r}. Hugh Spenser the fadyr was drawen,[48] hanged and beheded at Bristoll. Also in this yere, be the assent of alle the lordes of Engelond spirituelx and temperelx, and be alle the comonalte of the reaume, be fre eleccion of them alle, and resyngnacion of kyng Edward the fadyr, Sire Edward his sone was chosen kyng of Engelond.[49]

[Footnote 48: "and Sir Hugh Spencer the father was drawen," &c. _in the Cotton MS._]

[Footnote 49: "the yere of his age xv."--_Ibid._]

* * * * *

NOMI'A MAIOR' ET VICECOMITU' LONDON' TEMPORE REG' EDWARDI T'TIJ, QUI CORONATUS FUIT APUD WESTM' DIE D'NICA PRIMO DIE FEBRUAR' ANNO D'NI MILL'MO CCC^{mo} xxvj^{to}, ET ANNO ETATIS SUE xiiij,[50] P'RE SUO AD TUNC VIVENTE.

[Footnote 50: "et anno etatis sue xiiij" _is omitted in the Cotton MS._]

REX EDWARDUS TERTIUS. [1327-1328.]

Ric'us Betayn, maior, Ric' Rotyng. A^{o}. p'mo.
goldsmyth. Rog' Chauntecler.

[Sidenote: Too mones and too popes.]

[Sidenote: Southwerk was graunted to ferme. ]

[Sidenote: The foundacion of Garlykhithe chirch.]

In this yere were seyn in the firmament too mones, and in this yere were too popes. Also in this yere, the vj day of March, the kyng confermed the lettres and the fraunchises of London. Also he graunted that the meire schulde ben on of the justices at Newgate. Also he graunted to the schirreves of London and Midd' the ferme of the schirrevehode for ccc^{li} be yere, as it was in old tyme. Also he graunted that the schirreves of London ne the citezens schulde nought be charged with men that fledden to holy chirche, ne they schulde not be constreyned to gone out of the citee of London to eny werre. Also the same tyme the kyng graunted that the liberties and fraunchises of London schulde nought after that tyme for no cause be taken into the kynges hond: and the same tyme Suthwerk was graunted to the schirreves of London to have to ferme: also the same yere, after the fest of Pask', the kyng ordeyned an huge oost for to feighte ayens the Scottes; and S^{r}. John of Henaude come into Engelond with[51] men of armes for to helpe the yonge kyng Edward. And the Scottes comen into Engelond and deden muche harme, and distroyden the contreye tyl they comen to the park of Stanhope in Wyrdale, where they helden them in a busshement in the parke. And the kyng besette the park alle aboughte that the Scottes schulde never escaped: but thorugh treson of the Mortymer they escapid everych on, and so the kyng was disceyved. And also in this same yere of oure lord a m^{l}cccxxvj, be treson of Sire Roger Mortymer, kyng Edward[52] was sclayn in the castell of Berkele.[53] Also in this yere, in the[54] conversion of seynt Poul after Cristemesse, the kyng spoused dame Philip' the erles doughter of Henawde at York. Et id'm Ric'us Rothyng' tunc vic' fundavit eccl'iam de Garlykhithe s'c'i Jacobi et dotavit.

[Footnote 51: "V c." _in the Cotton MS._]

[Footnote 52: "the fadir"--_Ibid._]

[Footnote 53: "in the xxj yere of his reigne."--_Ibid._]

[Footnote 54: "even of the"--_Ibid._]

REX EDWARDUS TERTIUS. [1328-1329.]

Hamo Chikewell, m'. Herry Darcy. A^{o}. s'c'do.
John Hawteyn.

[Sidenote: Scottes wer discharged of their homage:]

[Sidenote: with the blakke crosse.]

This yere, in the feste of Pentecost, the kyng helde his parlement at North'; at whiche parlement, thorugh counseill of the Mortymer, the kyng of yonge age and withinne age accorded with the Scottes, and foryaf and relesed them al the homage and feautee that they oughte to do to the crown of Engelond be chartre ensealed and an endenture, in whiche were conteyned alle the homages and feautes that the kyng of Scotlond and the lordes of the same lond schulde do to the kyng of Engelond, which was ensealed with alle the seales of alle the grete lordes of Scotlond spirituelx and temporelx, and other chartres and remembraunces that kyng Edward and hise barons hadde of right in the lond of Scotlond; which alle, thorugh counseille of quene Isabell the kynges modir, and S^{r}. Roger Mortymer, were delyvered to the Scottes with the blak crosse of Scotlond, the whiche goode kyng Edward the kynges ayell[55] hadde conquered in Scotlond and broughte it fro the abbeye of Stone, whiche was a precious relyke, the whiche was also delyvered to the Scottes: also the kyng, thorugh counseill of his modir and of the Mortymer, relesed and foryaf alle that right that the barons out of Engelond hadden in ony londes of Scotlond of olde conquest.

[Footnote 55: "his grandfather" _in the Cotton MS._]

REX EDWARDUS TERTIUS. [1329-1330.]

John Grantham, m'. Simon Fraunceys. A^{o}. iij^{cio}.
Herry Combemartyn.

[Sidenote: A p'lement at Salesby. Rog' Mortemer was made erle of Marche: S^{r}. John Eltham the k' brother erle of Cornewalle.]

[Sidenote: Dyd homage to the kyng of Fraunce.]

This same yere David Bruz the sone of Robert Bruz, be ordynaunce of the kynges modir and of the Mortymer, spousyd at Berewyk dame Johanne of the Tour, the kynges suster, upon Marie Magdaleyn day, in the yere of oure lord a m^{l}cccxxviij: and whanne the maryage was done, the Scottes called here in despyte of Engleyssh men "make pees";[56] but the kyng bar the blame wrongfully. This yere the kyng helde his parlement at Salesbury; and at that parlement Sire Roger Mortymer was mad erle of the March, and S^{r}. John Eltham the kynges brother was also mad erle of Cornwayle. Also this same yere Sire Edmond Wodestoke erle of Kent, the kynges uncle, was beheded at Wynchestre, thorugh procurment of the quene, the kynges modir, and of the Mortymer. Also in this yere the kyng seyled into Fraunce, that is to seye the yere of oure lord a m^{l}cccxxviij, and dede homage to the kyng of Fraunce for the ducherye of Guyene and for the counte of Pountyf.

[Footnote 56: "the countes make peas" _in the Cotton MS._]

REX EDWARDUS TERTIUS. [1330-1333.]

Simon Swaynlond, m'. Rob't of Ely. Anno iiij^{to}.
Th' Harewold.

[Sidenote: Prynce Edward was born.]

This yere Edward the firste begeten sone of kyng Edward the thridde was born at Wodstoke, the day of seynt Viti and Modest'.

John Pounteney, m'. Rob't of Ely. A^{o}. v^{to}.
Tho's Harewold.

[Sidenote: S^{r}. Rog' Mortim' was hanged.]

In this yere Edward Bailloil, the sone of John Bailloil sumtyme kyng of Scotlond, come into Engelond chalangynge his right heritage of the kyngdom of Scotlond, and arreyved at Dounfermelyne; where, faste be the abbeye, ii m^{l} Englysshmen scomfited and xl m^{l} Scottes.[57] In the same yere Sire Roger Mortymer was hanged upon a theves galowes, on seynt Andrew even, in the yer of oure lord a m^{l}cccxxx^{ti}.

[Footnote 57: _See note_ L.]

Id'm maior. John Mokkyng. Anno vj^{to}.
Andr' Aubrey.

[Sidenote: Sege of Berwyk.]

[Sidenote: The yeldyng of the castell of Berewyk and the town.]

The same yere kyng Edward beseged the town and the castell of Berewyk: and upon seynt Margeretes even the Scottes in wondyr grete noumbre comen for to remove the sege, with whom the kyng faughte and discomfyted them: and there were sclayn of the Scottes viij erles and a m^{l} and ccc knyghtes and squyers, and of footfolke mo thanne xxxv m^{l}; and of Englysshmen there were dede a knyght and a squyere and xij footfolke. And so upon seynt Margarete day the town and the castell were yolde to the kyng, in the yere of oure lord a m^{l}cccxxxj.

REX EDWARDUS TERTIUS. [1333-1336.]

John Preston, m'. Nicholl Pyk. Anno vij^{mo}.
John Housbonde.

Also in the same yere the kyng Edward sclough many Scottes, and he recovered the castell of Kilbrigge.

John Pounteney, m'. John Hamond. A^{o}. viij^{to}.
Will' Hansard.

[Sidenote: The kyng of Scotland did homage: and allso the duke of Bretayn.]

In this yere the kyng of Scotlond come into Engelond to the newe castell upon Tyne: and aboughte the feste of the Nativite of seynt John baptiste, there he dede homage to kyng Edward. The same yere the duke of Bretayne dede homage also to the kyng for the counte of Richemond.

Reynald at the Conduyt, m'. John Kyngeston. A^{o}. ix^{o}.
Walt' Turk.

[Sidenote: A gret moreyn of men and of bestes.]

[Sidenote: xl _s._ j quart whete.]

This same yere was a gret moreyn of beestes and of men also, and gret habundance of reyne, where thorugh there was so gret derthe of corne that a quarter of whete was worth xl _s._

REX EDWARDUS TERTIUS. [1336-1340.]

Id'm maior. Walt' Moordon. Anno x^{mo}.
Ric' Upton.

In this yere the Scottes offendeden ayeyne: and the kinge wente over the Scottyssh see and werred upon the Scottes, and overcame them myghtyly, at whiche tyme the erle of Morre was taken.

John Pounteneye, m'. Will' Bikkesworth. A^{o}. xj^{mo}.
John Northale.

[Sidenote: Stella comata.]

[Sidenote: j q'rt' of whete ij _s_; and a fat oxe for di' marc; and vj pegons for a peny.]

This same yere, in the monthe of Juyne and July, in diverses parties of hevene appered stella co'mata. Also in this yere was gret plente of vitaile, that a quarter of whete was sold at London for ij _s_; and a fat oxe for vj _s._ viij_d_; and vj pegons for a peny: but natheles it was ful gret scarste of money. Also this yere deyde S^{r}. John of Eltham.

Herry Darcy, m'. Walt' Neel. Anno xij^{mo}.
Nicholl Grave.

[Sidenote: The counte of Cornwayle was made a duche.]

[Sidenote: Sergeaunts of the maire and the schirreves of London schulde b're maces of silv'.]

In this yere kyng Edward made of the counte of Cornwayle a duche, which he yaf to Edward his firste begetyn sone, withe the erledom of Chestre. Also, the kyng graunted that the seriaunts bothe of the meire and the schirreves of London schulde beren before the maire and the schirreves of London maces of silver and over gilte, withe the kynges armes.

Id'm maior. Will' Pomfreyt. Anno xiij^{o}.
Hugo Marleberer.

In this yere the kyng and the quene seyled to Braban; and at the town of Andewarp the quene chylded S^{r}. Leonell. And this same yere in Braban the kyng made first cleyme to the crowne of Fraunce.

REX EDWARDUS TERTIUS. [1340-1342.]

Andr' Aubrey, m'. Will' Thorney. Anno xiiij^{mo}.
Rog' Forsham.

[Sidenote: A p'lement at London.]

[Sidenote: The kyng asked moche good for his werres.]

[Sidenote: The coyne of the noble, half noble, and ferthyng.]

This same yere the kyng held his parlement at London; and he axed to begynne hise werres the fyfthe part of alle the moeble goodes of Engelond, and the custume of wolles, and the ix schef of every manere of corn, the which was graunted. And in this yere the kyng changed hise armys: and also the kyng made the coyne of goold; that is for to seyne the noble, the half noble, and the ferthyng. And this yere was called the firste yere oft oure kyng of the regne of Fraunce.

Id'm maior. Adam Lucas. Anno xv^{o}.
Barth'us Mareys.

[Sidenote: The bataill of Scluse.]

[Sidenote: The comaundement of the Emp'o^{r} of Tartary.]

This same yere the kyng faught with the Frensshmen at Scluse, where there were sclayn of Frensshmen xxx m^{l}; and the kyng toke and scomfyted at the sayd bataill of Scluse cccx schippes. And in this yere the kyng began the bataill of Torneye, and the town of seynt Amandys was distroied. And in the same yere, on seynt Andrewes even, kyng Edward come fro beyonde the see be nyghte to the tour of London, and there tok manye lordes and peres of the reaume and putte them into preson. And in this yere of kyng Edward began the firste yere of his regne of the kyngdom of Fraunce. Also in this yere of oure lord a m ccc xl^{ti}, there was sente out a maundement fro the emperor of Tartarye into alle hise londes and kyngdomes, that every man schulde use what lawe and beleve that he wolde, be so that he schulde worschep non idoles but only everelyvynge God.

REX EDWARDUS TERTIUS. [1342-1346.]

John Oxenford maior p' Ric' Berkyng. A^{o}. xvj^{o}.
p'te a^{i}. et Simon John Rokesley.
Fraunceys p' alia p'te.

In this yere the kyng lefte the sege of Turney.[58]

[Footnote 58: _See note_ M.]

Simon Fraunceys, m'. John Lovekyn. A^{o}. xvij^{o}.
Ric' Kelsyngby.

[Sidenote: T're motus magnus.]

In this yere was a gret turnement at Dunstaple of alle the chivalrye and gentyles of Engelond. And in this yere was a gret erthequake.

John Hamond, m'. John Syward. A^{o}. xviij^{o}.
John Aylesham.

This same yere the noble kyng Edward held his parlement at London, in whiche parlement he made Edward his oldest sone prynce of Walys.

Id'm maior. Geffrey Whityngham. A^{o}. xix^{o}.
Thomas Legge.

[Sidenote: Knyghtes of the Garter.]

In this yere the kyng began the rounde table at Wyndesore, that is to seye, the ordre of Knyghtes of the Garter.

REX EDWARDUS TERTIUS. [1346-1348.]

Ric' Lacere, m'. Edmond Hampenale. A^{o}. xx^{mo}.
John Gloucestr'.

This yere the kyng sailed over the see into Bretayne and into Guyen, and come ageyn this same yere.

Geffrey Whityngham, m'. Will's Clopton. A^{o}. xxj^{mo}.
John Croydon.

[Sidenote: The bataile of Cressy.]

[Sidenote: Sege of Caleys.]

This same yere kyng Edward seyled into Normandye; and in the xij day of Juyll he arryved at Hogges; and the xvj[59] day of Juyll the kyng faught with the Normaundes at the brigge of Cadoun, where there were taken the erle of Ewe, the lord Tankervyle, and an hundred knyghtes, and of men of armes vij[60] c; and moche peple of Normandye were sclayn. Also in this same yere in the xxvj day of August, the yere of oure lord a m^{l}cccxlvj, was the bataile of Cressy, in whiche bataill were sclayn the kyng of Beame, the duke of Loreyne, the erle of Alaunson, the erle of Flaundres, the erle of Bloys, the lord of Harecourt, the lord of Awmarle, the erle of Navers, and manye othere knyghtes and barons to the noumbre of xv^{c} xlij; and kyng Phillip fledde. And the thridde day of Septembre folwynge the kyng began the sege of Caleys, whiche sege he contynued unto the thridde day of August next folwynge. Also the same yere, durynge the forsaid sege, David kyng of Scotlond was taken at the bataille of Derham, the xvj kal' of Novembre, whiche kyng was raunsoned at an hundred m^{l} marcs, to be payed in x yere, that is to sey every yere x m^{l} mark.

[Footnote 59: "xxvj"--_in the Cotton MS._]

[Footnote 60: "vj c."--_Ibid._]

REX EDWARDUS TERTIUS. [1348-1351.]

Thomas Legge, m'. Adam Brakson. A^{o}. xxij^{do}.
Ric' Basyngstoke.

[Sidenote: Caleys was yolden.]

This yere durynge the segee of Caleys the kyng Phillip of Fraunce, purposynge to remeve the sege, cam the xxvij day of Juyll, and proposed bataille to kyng Edward, and assigned day and place; and kyng Edward accepted it with a glad chere: and kyng Philipp undirstondynge of this thinge, the nyghte folowynge he brende the tentes and cowardly fledde awey: and so the peple withinne the town, seynge no comfort of rescues, yolden the town to the kyng with the castell the ix^{e} day of August. And aboughte the feste of seynt Mighell kyng Edward, which dede a glorious tryumphe, retorned ayene into Engelond.

John Lovekyn, m'. Herry Picard. A^{o}. xxiij^{cio}.
Simon Dolcelle.

[Sidenote: A gret reyn.]

In this yere began the grete pestilence among the Sarazynes, that unethes it lefte the x man alyve. And this same yere, that is to seye the yere of oure lord a m^{l} ccc^{mo} xlviij^{o}, it reyned contynuelly for the moste partye fro the Nativite of seynt John baptist unto Cristemasse next folwynge.

Walt' Turk, maior. Adam of Bery. A^{o}. xxiiij^{to}.
Rauf Lynne.

[Sidenote: Gret pestylence.]

This same yere of oure lord a m^{l}cccxlviij^{o}[61] was the grete pestylence at London, which endured fro the feste of Myghelmesse unto the monthe of August sewyng.

[Footnote 61: "m^{l}, iij^{c} xlix" _in the Cotton MS._]

REX EDWARDUS TERTIUS. [1351-1355.]

Ric' Kylsyngby, m'. John Notte. Anno xxv^{to}.
Will's Worcetr'.

[Sidenote: Bellu' sup' mare int' regem E. et les Spaynardes.]

In this yere of oure lord a m^{l}cccl the kyng faughte with the Spaynardes on the see, besyde Wynchelse and Romeneye: and thankyd be God the kyng hadde the victorye, and wan there manye a faire vessell.

Andr' Aubrey, m'. John Wroth. A^{o}. xxvj^{to}.
Gilb't Steynethorp,
goldsmythe.

[Sidenote: New moneye of grotes and half grots and pens.]

In this yere of oure lord a m^{l}ccclj the kyng made newe moneye; that is to seye grotes, and half grotes, and penyes: natheless the weyte was lasse be v _s._ in the pound than the olde starlyng. Also in this yere two fysshmongers were beheded at the standard in Chepe.

Adam Fraunceys, m'. John Pecche. A^{o}. xxvij^{o}.
John Stodeye.

[Sidenote: The dere Somer.]

In this yere was a gret derthe of vitailes in somer tyme. In this yere was a gret droughte, whiche endured fro the begynnyng of March unto the laste ende of Juyll.

Id'm maior. Will' Welde. Anno xxviij^{o}.
John Lytele.

[Sidenote: The first duk of Lancastre.]

The same yere after Estre the kyng held his parlement at Westm', in whiche parlement Herry erle of Lancastre was mad duke of Lancastre, whiche was the firste duke of Lancastre.

REX EDWARDUS TERTIUS. [1355-1357.]

Thomas Legge, m'. Will' Totenham. A^{o}. xxix^{o}.
Ric' Smelte.

[Sidenote: The staple of wolles were ordeyned.]

In this yere kyng Edward and kyng Phillip of Fraunce were sworne to kepe pees; and kyng Edward schulde have in pees, withoute homage doyng, alle the londes of Guyon, Angeoy, and Normandye, and othere that longen to hym be heritage of olde tyme. Also this yere the kyng revoked the staple of wolles out of Flaundres, and ordeyned it to be in diverses places of Engelond; that is to seye, at Westm', Caunterbury, Chichestre, Bristoll, Lincoln, and at Hull.

Simon Fraunceys, m'. Th' Forst'. A^{o}. xxx^{o}.
Walt' Brandon.

[Sidenote: The custume of wollys was graunted to king E.]

This same yere deyde kyng Philip of Fraunce, and John his eldest sone was crowned kyng of Fraunce. And the same yere kyng Edward seyled over the see and landed at Caleys, whiche with all his oost rood forth into Fraunce to mete with kyng John, that wykkedly hadde broken the pees. And anon kyng John wyste of his comynge, cowardly he fledde: and he dede all his peple 'carie awey there vitailes and goodes, that kyng Edward and his peple'[62] in nothing schulde be refresshed. Also the same yere the Scottes token the town of Berewyk, but the castell was kepte stille be Englysshmen. Also the same yere was graunted to kyng Edward the custume of wolles; that is to say, l _s._ of the sakke for the terme of vj yere folwynge.

[Footnote 62: _Supplied from the Cotton MS._]

REX EDWARDUS TERTIUS. [1357-1360.]

Herry Picard, m'. Ric' Notyngham. A^{o}. xxxj^{mo}.
Thomas Dolcell.

[Sidenote: Kyng of Scotlond gave upp the realme of Scotlond.]

[Sidenote: Kyng of Fraunce John was taken at the bataill of Peyters, and othere lordes with hym.]

This yere S^{r}. John Bailloil kyng of Scotlond yaf up the reaume of Scotlond and the crowne to kyng Edward at Rokesburgh. Also in this yere the town of Berewyk was yolden up to kyng Edward. And in this same yere, that is to seye the yere of oure lord a m^{l} ccclvj^{to}, the xix day of Septembre, kyng John of Fraunce was taken at the bataill of Peyters be the doughty prynce Edward the firste sone of kyng Edward. Also Sire Philip his sone was taken with hym; and the erle of Pountys, the erle of Ewe, the erle of Longeville, the erle of Tankervyle, with othere viij erles and thre bysshoppes: and there were sclayn the duke of Burbon, the duke of Daceus constable of France, and the bysshop of Chalons, and manye othere grete lordys of Fraunce; and the dolphyn fledde.

John Stodeye, m'. Steph'us Caundyssh. A^{o}. xxxij^{do}.
Barth'us Fretlyng.