Chapter VI: Part 6

But he that begynneth by counsayll and wysdome
Alway procedynge with good prouysyon
Notynge what is past and what is for to come
Suche folowys godly scripture and monycion
In happy wayes without transgressyon
Of goddes lawes, and his commaundement
And often tymes comys to his intent.

Thus it appereth playne and euydent
That wyse prouysyon, prose and good counsayle
Are moche laudable, and also excellent
And to mankynde great profyte and auayle.
Where as those folys haue often cause to wayle
For theyr mysfortune, in sorowe vexed sore
Whiche ought begyn nat prouydyd before

THE ENUOY OF ALEXANDER BARCLAY.

O man remember thou canste nat abyde
Styll in this lyfe therfore moste specially
For thy last ende thou oughtest to prouyde.
For that prouysion forsoth is most godly
And than next after thy mynde thou ought aply
To fle offence, and bewayle thyne olde synne
And in all workes and besynes worldly
What may be the ende marke well or thou begynne

* * * * *

Of disordred loue and veneryous.

O cruel Uenus forsoth who doth insue
Thy flaterynge gylys and proude commaundement
And hastyth nat the dartis to eschewe
Of blynde Cupido but folowys his intent
Suche folys endure moche sorowe and turment
Wastynge theyr goodes dishonestynge their name
As past fere of god and sekynge after shame

Howe many yllys, what inconuenyence
Howe great vengeaunce, and howe bytter punysshement
Hath god oft takyn for this synne and offence
Howe many Cytees hye and excellent
Hath Uenus lost, destroyed, and alto brent
What lordes and howe many a great estate
Hath loue lost, murdred, or els brought in debate

The noble Troyans murdred ar and slayne
Theyr cyte brent, decayde is theyr kyngdome
Theyr kynge pryant by pyrrus dede and slayne
And all this by Parys vnhappy loue is come
Whiche voyde of grace and blynde without wysdome
To fyll his lust, from Grece rubbyd Helayne,
But this one pleasour was grounde of moche payne

Also Marcus a Prynce of the Romayns
Called Antonius by another name
After that he had ouercome the persyans
To Rome retournyd with tryumphe lawde and fame
And there (whiche after was to his great shame)
With cleopatra in loue was take so in blyndnes
That he promysyd to make hir empresse

So this blynde louer to fyll his interpryse
Caused his men two hondred shyppes ordayne
And toke the see wenynge in suche fourme and wyse
His lewde desyre: to perfourme and obteyne
But shortly after was he ouercome and slayne
Of Cesar: and whan he this purpose vnderstode
He bathed his Corse within his lemmans blode

For two serpentis that venemus were and fell
Were set to the brestis of fayre Cleopatray
So this cruell purpose had punysshement cruell
For theyr intendynge theyr countrey to betray
And worthy they were, what man can it denay
Thus it apereth playne by euydence
That of false loue cometh great inconuenyence

For he that loueth is voyde of all reason
Wandrynge in the worlde without lawe or mesure
In thought and fere sore vexed eche season
And greuous dolours in loue he must endure
No creature hym selfe may well assure
From loues soft dartis: I say none on the grounde
But mad and folysshe bydes he whiche hath the wounde

Aye rennynge as franatyke no reason in his mynde
He hath no constaunce nor ease within his herte
His iyen ar blynde, his wyll alwaye inclyned
To louys preceptes yet can nat he departe
The Net is stronge, the fole caught can nat starte
The darte is sharpe, who euer is in the chayne
Can nat his sorowe in vysage hyde nor fayne

Rede howe Phedra hir loue fixed so feruent
On ypolitus in prohybyte auowtry.
That whan he wolde nat vnto hir consent
To hir husbonde she accused hym falsly
As if he wolde hir tane by force to vylany
Ipolitus was murdred for this accusement
But Phedra for wo hanged hyrself incontynent

The lewde loue of Phasyphe abhomynable
As poetis sayth) brought hir to hir confusyon
Nero the cruell Tyrant detestable.
His naturall mother knewe by abusyon
Uenus and Cupido with their collusyon.
Enflamyd Messalina in suche wyse
That euery nyght hir selfe she wolde disgyse

And secretly go to the brothelhous
For to fulfyll hir hote concupyssence
What shall I wryte the dedes vicious
Of Julia or, hir cruell offence.
What shall I wryte the inconuenyence
Whiche came by Danythys cursed auowtry
Syth that the bybyll it shewyth openly

What shall I wryte the greuous forfayture
Of Sodom and Gomor syns the Bybyll doth tell
Of their synnes agaynst god and nature
For whiche they sanke alyue downe into hell.
Thus it aperith what punysshement cruell.
Our lorde hath taken both in the olde lawe and newe
For this synne: whiche sholde vs moue it to eschewe

ALEXANDER BARKLAY TO THE FOLYS.

Ye folys inflamyd with loue inordynate.
Note these examples, drawe from this vyce your mynde
Remember that there is none so great estate
But that false loue hym causeth to be blynde
Our folysshe wymen may nat be left behynde
For many of them so folowys in this way
That they sell theyr soules and bodyes to go gay

The graceles galantes, and the aprentyce pore
Though they nought haue, themselfe they set nought by
Without they be acquaynted with some hore
Of westmynster or some other place of rybawdry
Than fall they to murder theft and robery.
For were nat proude clothynge, and also flesshely lust
All the feters and gyues of Englonde shulde rust.

Therfore folys awake, and be no longer blynde
Consyder that shame, seknes, and pouertye
Of loue procedeth: and drawe from it your mynde
Suffre not your soules damned and lost to be
By vayne lust and carnall sensualyte
For thoughe the small pleasure do make the fayne
The ende oft is worldly wo and myserye
Or amonge the fendes eternall payne

* * * * *

Of them y^t synne trustynge vpon the mercy of god.

The wynde is up our Nauy is aflote
A bande of Folys a borde is come yet more
Theyr cursed maners and mad I shall nowe note
Whose herte for synne is neyther contryte ne sore
Nat mornynge (as they ought to do) therfore
Without fere styll lyuynge in theyr vyciousnes
No thynge inclyned to godly holynes

They thynke no thynge on goddes rightwysnes
But grounde them all, on his mercy and pyte
For that he redyer is vnto forgeuenesse
Unto all people, than them punysshed to se
Trouth it is that the great enormyte
Of the worlde hathe nat aye worthy punysshement
Nor he nat damnyd that doth his synne repent

Put case he gyuyth nat aye lyke iugement
On mannys mysdede, nor yet mundayne offence
And though he be gode meke and pacyent
Nor shortly punyssheth our inconuenyence
Put case also he gyue nat aduertence
To all mundayne fawtes synne and fragylyte
Yet none sholde synne in hope of his mercy

But these folys assembled in a companye
Sayth eche to other that oft it is laufull
To perseuerant synners lyuynge in iniquyte
Yo trust in god syns he is mercyfull
What nedeth vs our wyttis for to dull
Labourynge our synne and foly to refrayne
Syns synne is a thynge naturall and humayne

Than sayth another forsoth thou sayst playne
And also our fore Faders and progenitours
Before our dayes offendyd haue certayne.
As well as we, in many blynde errours
But syns they haue escapyd all paynes and dolours
Of hell; and nowe in heuyn ar certayne
What nede haue we to fere infernall payne.

Than comys in an other with his dotysshe brayne
By god sayth he I knowe it without fable
That heuyn was made neyther for gose nor crane
Nor yet for other bestes vnresonable
Than of the Scripture doth he Chat and bable
Alleggynge our forefaders whiche haue mysdone
Saynge that no synne is newe in our season

A myserable men destytute of reason.
That thus on hope do synne vnhappely
Remember the synne of our forefaders done
Haue neuer ben left vnpunysshed fynally
And that somtyme, full sharpe and bytterly
For euer more all synne hath had a fall
With sorowe here, or els wo infernall

The synne of Sodom foule and nat natural
The Pryde of rome, whiche was so excellent
The offence of Dauyd Prophete and kynge royal
The furour of Pharao fyers and violent
Haue nat escaped the rightwyse punysshment
Of God aboue, the celestial and highe Justice
Which fyrst, or last punyssheth euery vyce.

Remember Richarde lately kynge of price
In Englonde raynynge vnrightwisely a whyle.
Howe he ambycion, and gyleful Couetyse
With innocent blode his handes dyd defyle
But howbeit that fortune on hym dyd smyle
Two yere or thre: yet god sende hym punysshment
By his true seruant the rede Rose redolent.

Therfore remember that god omnypotent
Oft suffreth synners in theyr iniquyte
Grauntynge them space and tyme of amendement
And nat to procede in their enormyte
But those synners that byde in one degre
And in this lyfe their synne wyll nat refrayne
God after punyssheth with infernall payne

As I haue sayde (therfore) I say agayne
Though god be of infynyte pety and mercy
His fauour and grace passynge all synne mundayne
Yet iustice is with hym eternally.
Wherfore I aduyse the to note intentifly
Though pyte wolde spare, iustyce wyll nat so
But the here rewarde, els with infernal we.

ALEXANDER BARKLAY TO THE FOLYS.

Syghe synners, syghe, for your mysgouernance.
Lament, mourne, and sorowe for your enormyte.
Away with these Clowdes of mysty ignorance
Syn nat in hope of goddys hyghe petye
And remember howe ye daily punysshed be
With dyuers dyseases both vncouthe and cruel
And all for your synne, but suche as escapeth fre
And styl lyue in syn, may fere the peynes of helle

* * * * *

Of the folisshe begynnynge of great bildynges without sufficient prouision.

Who euer begynneth any worke or dede
Of byldynge or of other thynge chargeable
And to his costes before taketh no hede
Nor tyme nat countyth to his worke agreable
Suche is a fole and well worthy a babyll
For he that is wyse wyll no thynge assay
Without he knowe howe he well ende it may.

The wyse man counteth his cost before alway
Or he begyn, and nought wyll take in honde
Wherto his myght or power myght denay
His costes confourmynge to the stynt of his londe
Where as the fole that nought doth vnderstonde
Begynneth a byldynge without aduysement
But or halfe be done his money clene is spent.

Many haue begon with purpose dilygent
To bylde great houses and pleasaunt mansyons
Them thynkynge to finysshe after theyr intent
But nede disceyuyd hath theyr opynyons
Their purpose nat worth a cowpyll of onyons
But whan they se that they it ende nat can
They curse the tyme that euer they it began

Of Nabugodosor that worthy man.
What shall I wryte or the story to the tell
Syth that the Bybyll to the expresse it can
In the fourth chapter of the prophete Danyell
Was he nat punysshed in paynes cruell
For his great pryde and his presumpcion
Whiche he toke it in the byldynge of Babylon

His golde and treasoure he spendyd hole theron
Enioynge hym in his Cyte excellent
Right so Nemroth by his inuencion
The towre of Babylon began for this intent
To saue hym, if the worlde agayne were drent
But the hye god consyderynge his blynde rage
His purpose let by confusyon of langage

His towre vnperfyte to his losse and domage
His people punysshed, hymselfe specyally
Thus it apereth what great disauauntage
On theyr hede falleth that byldeth in foly
Thus he is folysshe that wolde edefy
Any great worke without ryches in excesse
For great byldynges requyreth great rychesse

But many folys ar in suche a blyndnesse
That hereon nought they set their mynde ne thought
Wherfore to them oft commyth great distresse
And to great pouerty often ar they brought
Laughed to scorne, their purpose cometh to nought
And truely I fynde in bokes wryten playne
That our olde faders haue neuer set theyr brayne

On great byldynge, ne yet of them ben fayne:
It longeth to a lorde a Prynce or a Kynge
That lacke no treasoure theyr werkes to mayntayne
To set theyr myndes on excellent buyldynge
Therfore who so euer wyll meddle with this thynge
Or any other, before let hym be wyse
That his myght and ryches therto may suffyse.

Lyst all men do mocke and scorne his interpryse
For if he ought begyn without prouysyon
And haue nat wherby his byldynge may up ryse
All that is lost that is made and begon
And better it is sothly in myn intencion
Nought to begyn, and spare laboure and payne
Than to begyn and than, leue of agayne

Who euer he be that so doth certayne
He shall haue mockis mengled with his damage
Therfore let suche folys sharpe theyr brayne
And better intende to theyr owne auauntage
Consyderynge that processe of tyme and age
Theyr curyous byldynges shall at the lest confounde
And Roufe and wallys make egall with the grounde.

BARKLAY TO THE FOLYS.

Ye folys blyndyd with curyosyte
Whiche on great byldynge set so sore your mynde
Remember ye nat that doutles ye shall dye
And your gay byldynges and howses leue behynde
Thynke ye your conforte alway in them to fynde
Or whan ye dye, them hens with you to haue
Nay nay the laste hous gyuen to mankynde
Is the course grounde and walles of his graue.

* * * * *

Of glotons and dronkardes.

Within our nauy he nedes shall haue a place.
Whiche without mesure on lothsome glotony
Setteth his pleasure and singuler solace
His stomacke ouerchargynge, vyle and vngodely
And to none other thynge his mynde doth he aply
Saue depest to drynke, suche force nat of theyr soules
But labore in rynsynge pecis cuppis and bowles

The madnes of dronkennes is so immoderate
That greuous sores it ingendreth and sykenes
It causeth often great foly and debate
With soden deth and carefull heuynes
In thynges no difference putteth dronkennes.
It febleth the ioyntis and the body within
Wastynge the brayne makynge the wyt full thyn

It engendreth in the hede infirmyte
Blyndynge the herte wyt and discression
The mynde it demynyssheth, coloure and beaute.
Causynge all myschef, shame and abusyon
It maketh men mad, and in conclusyon
Causeth them lyue without lawe or measure
Suynge after syn defylynge theyr nature

The people that are acloyed with this synne.
On no thynge els theyr myndes wyll aply:
Saue to the wyne and ale stakes to renne
And there as bestes to stryue and drynke auy
Than ar they outher gyuyn to rybawdry
Or els to brawle and fight at euery worde
Thus dronkennes is the chefe cause of discorde

But namely dronkennes and wretchyd glotony
By their excesse and superfluyte
Engendreth the rote of cursed Lechery
With murder, thefte and great enormyte
So bryngeth it many to great aduersyte
And with his furour the worlde so doth it blynde
That many it bryngeth to a shamfull ende

This vyce (alas) good maners doth confounde
And maketh man ouer besy of langage
And hym that in all ryches doth abounde
It ofte in pryson bryngeth and in bondage
It causeth man to his great sorowe and domage
Disclose his secrete and his preuey counsayle
Whiche causeth hym after sore to mourne and wayle

Nought is more lothsome, more vycyous nor vyle
Than he that is subdued to this vyce
His lyfe shortynge his body he doth defyle
Bereuynge his soule the ioy of Paradyse
Howe many Cytees and lordes of great pryce
Hath ben destroyed by dronken glotony
And by his felawe, false loue, or lechery.

The sone of Thomyr had nat ben ouercome
Nor slayne by Cyrus for all his worthynes.
If he hym selfe had gydyd by wysdome
And the vyce auoydyd of blynde dronkennes
The great Alexander taken with this madnes
With his swerde, whan he was dronken slewe
Suche of his frendes as were to hym most trewe

I rede also howe this conquerour myghty
Upon a season played at the Chesse
With one of his knyghtes which wan ynally
Of hym great golde treasoure and rychesse
And hym ouercame, but in a furyousnes
And lade with wyne, this conquerour vp brayde
And to his knyght in wrath these wordes sayde

I haue subdued by strength and by wysdome
All the hole worlde, whiche obeyeth to me
And howe hast thou alone me thus ouercome
And anone commaundyd his knyght hanged to be
Than sayde the knyght by right and equyte
I may apele. syns ye ar thus cruell
Quod Alexander to whome wylt thou apell

Knowest thou any that is gretter than I
Thou shalt be hanged thou spekest treason playne
The knyght sayd sauynge your honour certaynly
I am no traytoure, apele I woll certayne
From dronken Alexander tyll he be sober agayne
His lorde than herynge his desyre sounde to reason
Differryd the iustyce as for that tyme and season

And than after whan this furour was gone
His knyght he pardoned repentynge his blyndenes.
And well consydered that he shulde haue mysdone
If he to deth had hym done in that madnesse
Thus it apereth what great unhappynes
And blyndnes cometh to many a creature
By wyne or ale taken without measure.

Se here the inconuenyence manyfolde
Comynge of dronkennes as I wrytyn fynde.
Some ar so starynge mad that none can them holde
Rorynge and cryeng as men out of their mynde
Some fyghtynge some chydynge, some to other kynde
Nought lyuynge to them selfe: and some dotynge Johnn
Beynge dronke thynketh hym as wyse as Salomon

Some sowe dronke, swaloynge mete without mesure
Some mawdelayne dronke, mournynge lowdly and hye
Some beynge dronke no lenger can endure
Without they gyue them to bawdy rybawdry
Some swereth armys nayles herte and body.
Terynge our lord worse, than the Jowes hym arayed
Some nought can speke, but harkenyth what is sayd.

Some spende all that they haue and more at wast
With reuell and reuell dasshe fyll the cup Joohnn
Some their thryft lesyth with dyce at one cast
Some slepe as slogardes tyll their thryft be gone
Some shewe theyr owne counsell for kepe can they none
Some are Ape dronke full of lawghter and of toyes
Some mery dronke syngynge with wynches and boyes

Some spue, some stacker some vtterly ar lame
Lyeng on the grounde without power to ryse
Some bost them of bawdry ferynge of no shame
Some dumme, and some speketh. ix. wordes at thryse
Some charge theyr bely with wyne in suche wyse
That theyr legges skant can bere vp the body
Here is a sort to drowne a hole nauy.

BARKLAYE TO THE FOLYS.

Alas mad folys howe longe wyll ye procede
In this beestly lyuynge agayst humayne nature
Cease of your Foly: gyue aduertence and hede
That in eche thynge ought to be had measure
Wyne ne ale hurteth no maner creature
But sharpeth the wyt if it be take in kynde
But if it be nat, than I the ensure
It dulleth the brayne, blyndynge the wyt and mynde

Rede all bokes and thou shalt neuer fynde
That dronkennes and wysdome may togyther be
For where is dronkennes, there madnes is by kynde
Gydynge the hauer to all enormyte
And where as is madnes thou shalt neuer se
Reason ne wysdome take theyr abydynge
In one instant, wherfore lerne this of me
That dronkennes is mortell enmy to cunnynge.

* * * * *

Of ryches vnprofytable.

It is great foly, and a desyre in vayne
To loue and worshyp ryches to feruently
And so great laboure to take in care and payne
Fals treasoure to encrease and multyply
But yet no wonder is it sertaynly
Syth he that is ryche hath gretter reuerence
Than he that hath sadnes wysdom and scyence

The ryche mannes rewardes stande in best degre
But godly maners we haue set clene asyde
Fewe loueth vertue, but fewer pouertye.
Fals couetyse his braunches spreddeth wyde
Ouer all the worlde, that pety can nat byde
Among vs wretches banysshed is kyndnes
Thus lyeth the pore in wo and wretchydnes

Without conforte and without auctoryte
But he only is nowe reputed wyse
Whiche hath ryches in great store and plente.
Suche shall be made a sergeant or Justyce
And in the Court reputed of moste pryse
He shall be callyd to counseyll in the lawe
Though that his brayne be skarsly worth a strawe

He shall be Mayre baylyfe or constable
And he onely promotyd to honoure
His maners onely reputed ar laudable
His dedys praysyd as grettest of valoure
Men laboure and seke to fall in his fauoure
He shall haue loue, echone to hym shall sue
For his ryches, but nought for his vertue

Se what rewardes ar gyuen to ryches
Without regarde had to mannys condycyon
A strawe for cunnynge wysdome and holynes
Of ryches is the first and chefe questyon
What rentes what londes howe great possessyon
What stuffe of housholde what store of grotz and pens
And after his gode his wordes hath credence.

His wordes ar trouth men gyue to them credence
Thoughe they be falsly fayned and sotell
But to the pore none wyll gyue aduertence
Though that his wordes be true as the gospell
Ye let hym swere by heuyn and by hell
By god and his sayntes and all that god made
Yet nought they beleue that of hym is sayde

They say that the pore men doth god dispyse
Thouhe they nought swere but trouth and veryte
And that god punyssheth them in suche wyse
For so dispysynge of his hye maiestye
Kepynge them for their synnes in pouerte
And theyr ryche exaltyth by his power and grace
To suche ryches, worldly pleasour and solace

The ryche ar rewarded with gyftis of dyuerse sorte
With Capons and Conyes delycious of sent
But the pore caytyf abydeth without confort
Though he moste nede haue: none doth hym present
The fat pygge is baast, the lene cony is brent
He that nought hathe, shall so alway byde pore
But he that ouer moche hath, yet shall haue more

The wolfe etis the shepe, the great fysshe the small
The hare with the houndes vexed ar and frayde
He that hath halfe nedes wyll haue all
The ryche mannes pleasour can nat be denayde
Be the pore wroth, or be he well apayde
Fere causeth hym sende vnto the ryches hous
His mete from his owne mouth, if it be delycious

And yet is this ryche caytyf nat content
Though he haue all yet wolde he haue more.
And though this gode can neuer of hym be spent
With nought he departyth to hym that is pore
Though he with nede harde vexed were and sore.
O cursyd hunger o mad mynde and delyte.
To laboure for that whiche neuer shall do profyte

Say couetous caytyfe what doth it the auayle
For to haue all and yet, nat to be content
Thou takest nat this sore laboure and trauayle
To thy pleasoure but to thy great turment
But loke therof what foloweth consequent
Whan thou art dede and past this wretchyd lyfe
Thou leuyst behynde brawlynge debate and stryfe

To many one ryches is moche necessary
Whiche can it order right as it ought to be
But vnto other is it vtterly contrary
Whiche therwith disdayneth to socoure pouerte.
Nor them relefe in theyr aduersyte
Suche shall our lorde sore punysshe fynally
And his petycion rightwysly deny

BARKLAY TO THE FOLYS.

Ye great estatis and men of dignyte
To whome god in this lyfe hath sent ryches
Haue ye compassion, on paynfull pouertye
And them conforte in theyr carefull wretchydnes
God hym loueth and shall rewarde doutles
Whiche to the nedy for hym is charitable
With heuenly ioy, whiche treasour is endeles
So shall thy riches to the be profytable.

* * * * *

Of hym that togyder wyll serue two maysters.

A fole also he is withouten doute
And in his porpose sothly blyndyd sore
Whiche doth entende labour or go aboute
To serue god, and also his wretchyd store
Of worldly ryches: for as I sayde before
He that togyder wyll two maysters serue
Shall one displease and nat his loue deserue

For he that with one hownde wol take also
Two harys togyther in one instant
For the moste parte doth the both two forgo
And if he one haue: harde it is and skant
And that blynde fole mad and ignorant
That draweth thre boltis atons in one bowe
At one marke shall shote to hye or to lowe

Or els to wyde, and shortly for to say
With one or none of them he strykis the marke:
And he that taketh vpon hym nyght or day
Laboures dyuers to chargeable of warke.
Or dyuerse offycis: suche wander in the darke
For it is harde to do well as he ought
To hym that on dyuerse thynges hath his thought

With great thoughtes he troubleth sore his brayne
His mynde vnstable, his wyt alway wandrynge:
Nowe here nowe there his body labours in payne
And in no place of stedfast abydynge.
Nowe workynge now musynge now renynge now rydynge
Now on see nowe on londe, than to se agayne
Somtyme to Fraunce, and nowe to Flaunders or Spayne

Thus is it paynfull and no thynge profytable
On many labours a man to set his mynde
For nouther his wyt nor body can be stable
Whiche wyll his body to dyuers chargis bynde
Whyle one goth forwarde the other bydes behynde
Therfore I the counseyll for thyne owne behoue
Let go this worlde and serue thy lorde aboue

He that his mynde settyth god truly to serue
And his sayntes: this worlde settynge at nought
Shall for rewarde euerlastynge ioy deserue
But in this worlde, he that settyth his thought
All men to please, and in fauour to be brought
Must lout and lurke, flater, lawde, and lye:
And cloke a knauys counseyll, though it fals be

If any do hym wronge or iniury
He must it suffer and pacyently endure
A dowble tunge with wordes lyke hony
And of his offycis if he wyll be sure
He must be sober and colde of his langage
More to a knaue, than to one of hye lynage

Oft must he stoupe his bonet in his honde
His maysters backe he must oft shrape and clawe
His breste anoyntynge, his mynde to vnderstonde
But be it gode or bad therafter must he drawe
Without he can Jest he is nat worth a strawe.
But in the meane tyme beware that he none checke
For than layth malyce a mylstone in his necke

He that in court wyll loue and fauour haue
A fole must hym fayne, if he were none afore
And be as felowe to euery boy and knaue
And to please his lorde he must styll laboure sore
His manyfolde charge maketh hym coueyt more
That he had leuer serue a man in myserye
Than serue his maker in tranquylyte

But yet whan he hath done his dylygence
His lorde to serue as I before haue sayde
For one small faute or neglygent offence
Suche a displeasoure agaynst hym may be layde
That out is he cast bare and vnpuruayde.
Whether he be gentyll, yeman grome or page
Thus worldly seruyce is no sure herytage

Wherfore I may proue by these examples playne
That it is better more godly and plesant
To leue this mondayne casualte and payne
And to thy maker one god to be seruaunt
Whiche whyle thou lyuest shall nat let the want
That thou desyrest iustly, for thy syruyce
And than after gyue the, the ioyes of Paradyse.

BARKLAY TO THE FOLYS.

Alas man aryse out of Idolatry.
Worshyp nat thy ryches nor thy vayne treasoure
Ne this wretchyd worlde full of mysery.
But lawde thy maker and thy sauyour
With fere, mekenes, fayth, glory, and honoure
Let thy treasoure onely in his seruyce be
And here be content with symple behauoure
Hauynge in this lorde trust and felycyte

* * * * *

Of to moche spekynge or bablynge.

Ye blaberynge folys superflue of langage
Come to our shyp our ankers ar in wayde
By right and lawe ye may chalange a stage
To you of Barklay it shall nat be denayde
Howe be it the charge Pynson hathe on me layde
With many folys our Nauy not to charge.
Yet ye of dewty shall haue a sympyll barge

Of this sorte thousandes ar withouten fayle
That haue delyte in wordes voyde and vayne
On men nat fawty somtyme vsynge to rayle
On folysshe wordes settynge theyr herte and brayne
They often touche to theyr owne shame and payne
Suche thynges to whiche none wyll theyr mynde aply
(Saue suche folys) to theyr shame and enuy

Say besy fole art thou nat well worthy
To haue enuy, and that echone sholde the hate
Whan by thy wordes soundynge to great foly
Thou sore labrest to engender debate
Some renneth fast thynkynge to come to late
To gyue his counsell whan he seeth men in doute
And lyghtly his folysshe bolt shall be shot out

Is it nat better for one his tunge to kepe
Where as he myght (perchaunce) with honestee
Than wordes to speke whiche make hym after wepe
For great losse folowynge wo and aduersyte
A worde ones spokyn reuoked can nat be
Therfore thy fynger lay before thy lypes
For a wyse mannys tunge, without aduysement trypes

He that wyll answere of his owne folysshe brayne
Before that any requyreth his counsayle
Shewith hym selfe and his hasty foly playne
Wherby men knowe his wordes of none auayle
Some haue delyted in mad blaborynge and frayle
Whiche after haue suffred bytter punysshement
For their wordes, spoken without aduysement

Say what precedeth of this mad outrage
But great mysfortune, wo and vnhappynesse
But for all theyr chattynge and plenty of langage
Whan to the preste they come them to confesse
To shewe theyr lewde lyfe theyr synne and wretchydnes
Whan they sholde speke, and to this poynt ar come
Theyr tunges ar loste and there they syt as domme

Many haue ben whiche sholde haue be counted wyse
Sad and discrete, and right well sene in scyence
But all they haue defyled with this one vyse
Of moche spekynge: o cursyd synne and offence
Pyte it is that so great inconuenience
So great shame, contempt rebuke and vylany
Sholde by one small member came to the hole body

Let suche take example by the chatrynge pye.
Whiche doth hyr nest and byrdes also betraye
By hyr grete chatterynge, clamoure dyn and crye
Ryght so these folys theyr owne foly bewraye.
But touchynge wymen of them I wyll nought say
They can nat speke, but ar as coy and styll
As the horle wynde or clapper or a mylle

But that man or woman or any creature
That lytell speketh or els kepeth sylence
Ar euer of them selfe moste stedfast and sure
Without enuy, hatred or malyuolence.
Where as to suche comys moche inconuenyence
Sorowe vpon sorowe, malyce and dysdayne
Whiche wyll no tyme, his speche nor tunge refrayne

Fayre speche is pleasaunt if it be moderate
And spoken in season, conuenyente and dewe
To kepe scylence, to pore man or estate
Is a great grace, and synguler vertue
Langage is lawdable whan it is god and true
A wyse man or he speke wyll be wyse and ware
What (to whome) why (howe) whan and whare

BARKLAYE TO THE FOLYS.

Ye bablynge brybours, endeuer you to amende
Mytygat by mesure, your prowde hasty langage
Kepe well your tunges so, shall ye kepe your frende
For hasty speche ingendreth great damage
Whan a worde is nat sayd, the byrde is in the cage
Also the hous is surest whan the dorys be barryde
So whan thy worde is spokyn and out at large
Thou arte nat mayster, but he that hath it harde

If thou take hede and set therto thy brayne
In this world thou shalt fynde thynges thre
Whiche ones past, can nat be callyd agayne.
The firste is (tyme lost) by mannes symplycyte
The seconde (youth) reuoked can nat be
The thyrde (a worde spoken) it gooth out in the wynde
And yet is the fourth, that is (virginyte)
My forgetfull mynde, had lefte it nere behynde

* * * * *

Of them that correct other and yet them selfe do nought and synne worse than they whom they so correct.

Nowe to our Nauy, a sorte maketh asaute
Of folys blynde, mad Jugys and Iniust
Whiche lyghtly noteth another mannes faute.
Chastynge that synne, whiche theyr owne mynde doth rust
By longe abydynge, and increas of carnall lust
They cloke their owne vyce synne and enormyte
Other blamynge and chastynge with moche cruelte

They mocke and mowe at anothers small offence
And redy ar a faute in them to fynde
But of theyr owne foly and inconuenyence
They se no thynge, for fully ar they blynde
Nat notynge the vyce rotyd in theyr owne mynde
Theyr greuous woundes and secrete malady
For theyr owne yll they seke no remedy

The hande whiche men vnto a Crosse do nayle
Shewyth the waye ofte to a man wandrynge
Whiche by the same his right way can nat fayle
But yet the hande is there styll abydynge
So do these folys lewde of theyr owne lyuynge
To other men shewe mean and way to wynne
Eternall ioy themselfe bydynge in synne

He sertaynly may well be callyd a sote
Moche vnauysed and his owne ennemy
Whiche in a nothers iye can spye a lytell mote
And in his owne can nat fele nor espye
A moche stycke, so is he certaynly.
Whiche noteth anothers small faute or offence
To his owne great synnes gyuynge none aduertence

Many them selfe fayne as chaste as was saynt Johnn
And many other fayne them meke and innocent
Some other as iust, and wyse as Salomon
As holy as Poule, as Job als pacyent
As sad as senecke, and as obedyent
As Abraham, and as martyn vertuous
But yet is theyr lyfe full lewde and vycious

Some lokyth with an aungels countenaunce
Wyse sad and sober lyke an heremyte
Thus hydynge theyr synne and theyr mysgouernaunce.
Under suche clokys lyke a fals ypocryte
Let suche folys rede what Cicero doth wryte
Whiche sayth that none sholde blame any creature
For his faut, without his owne lyuynge be sure

Without all spot of synne faut or offence
For in lyke fourme as a phesycyan.
By his practyse and cunnynge or scyence
The sekenes curyth of a nother man
But his owne yll nor dyseas he nat can
Relefe nor hele so doth he that doth blame
Anothers synne: he styll lyuynge in the same

Many ar whiche other can counseyll craftely
And shewe the peryll that may come by theyr synne
But them selfe they counseyll nat: ne remedy.
Nor take no waye whereby they heuyn may wynne
But lye in that vyce that they rotyd ar in
Leuynge the way that gydyth to ioy and rest
Their owne sensualyte ensuynge as a beest

Wherfore ye prestis that haue the charge and cure.
To teche and enfourme the rude comonte.
In goddys lawes groundyd in scripture
And blame all synnes sparynge no degre
Whyle ye rebuke thus theyr enormyte
Lyue so that none may cause haue you to blame
And if ye do nat: it is to your great shame

For without doute it is great vylany
A man to speke agaynst any offence
Wherin he well knowyth hym owne selfe gylty
Within his mynde and secrete conscience
Agaynst hymselfe suche one gyueth sentence
Howe god ryght iuge, by rightwyse iugement
Shulde hym rewarde with worthy punysshement

THE ENUOY OF BARKLAY TO THE FOLYS.

Ye clerkes that on your shulders here the shelde
Unto you graunted by the vnyuersyte.
Howe dare ye auenture to fyght in cristes felde
Agaynst synne, without ye clere and gyltles be
Consyder the Cocke and in hym shall ye se:
A great example, for with his wynges thryse
He betyth hym selfe to wake his owne bodye
Before he crowe, to cause other wake or ryse.

* * * * *

Of hym that fyndeth ought of another mannys it nat restorynge to the owner.

The feruour of ryches and disordred loue
Whiche many haue, doth me bynde and constrayne.
Within my shyp them sharply to reproue
That pen nor hande, themselfe wyll not refrayne
Of couetyse nowe I wyll nat speke agayne
But of them that kepeth by force and by myght
That thynge wherto they haue nat come, by ryght

Some fyndeth treasours other mennys good
And in theyr owne vse suche good they occupy.
Whiche of theyr myndes ar so blynde and wode.
And so reted in theyr errour and foly
That oft they say (say) ye and dare byde by
That some saynt whome they worshypped haue
Haue sende, them the same theyr honestee to saue

They haue no force nor care, nor they none haue wyll
To whome the ryches so loste dyde apertayne
That fortune hath gyuen they holde fast and kepe styll
Neuer hauynge mynde it to restore agayne
Suche folys fere no thynge euerlastynge payne
Nor note nat, that without true restytucion
It small auayleth to haue made confessyon.

Here me fole with thy immoderate mynde
Here me and do thy herte therto aply
If thou by fortune any ryches fynde
Callynge it thyne: thou lyest therin falsly
If thou haue wyt thou canst nat well deny
But that gode nat gyuen, nor gottyn by laboure
Can nat be rightwyse: thus mende thy blynde erroure

If thou ought fynde that longeth nat to the
Than is it anothers, the case is clere and playne
Wherfor thou ought of lawe and of dewte
Unto the owner it soone to yelde agayne
But if he be dede, to whome it dyd attayne
Thou ought nat yet to kepe it nere the more.
But to his sectours or heyres it restore

Put case that they also be past and dede
Yet ought thou nat to keep it styll with the.
The lawe commaundyth, and also it is mede.
To gyue it to suche as haue necessyte.
With it releuynge theyr paynfull pouertee
And so shalt thou discharge thy conseyence.
Helpynge the pore, and auoyde great offence

But he that others godes tourneth to his owne vse
Spendynge and wastynge that thynge that neuer was his
Suche certaynly his reason doth abuse
And by this meane greuously doth amysse
Wherby he lesyth eternall ioy and blysse
His soule drownynge depe within hell flodes
For his myspendynge of other mennys goodes

But to be shorte, and brefe in my sentence
And sothe to saye playne as the mater is
Forsoth I se nat right great difference
Bytwene a thefe, and these folys couetys
Both wrongly kepeth that thynge that is nat his
Thynkynge that god doth nat therto aduerte
Whiche notyth thy dedys, thy mynde thought and herte

Wherfore if thou haue a rightwyse conscyence
Thou wylt nought kepe whiche longeth nat to the
The lawe so commaundeth in payne of great offence
For of gode that thou kepest agaynst equyte
Thou shalt make accompt after that thou shalt dye
To thy great payne in hell for euer more
If thou no restytucion make before.

Here myght I touche executours in this cryme.
Blamynge theyr dedys dysceyte and couetyse
If it were nat for wastynge of my tyme
For mende they wyll nat them in any wyse
Nor leue no poyntes of theyr disceytfull gyse
Let them take parte of that whiche I here note
And be partynge foles in this present bote.

THE ENUOY OF BARKLAY THE TRANSLATOR TO THE FOLYS.

Ye false executours whome all the worlde repreuys
And ye that fynde mennes goodes or treasoures
I call you as bad as robbers or theuys
For ye by your falshode and manyfolde errours
Kepe falsly that thynge whiche is none of yours
And wast here the goodes of hym that is past
The soule lyeth in payne, ye take your pleasours.
With his ryches, damnynge your owne soule at the last

* * * * *

Of the sermon or erudicion of wysdome bothe to wyse men and folys.

Wysdome with voyce replete with grauyte
Callyth to all people, and sayth o thou mankynde
Howe longe wylt thou lyue in this enormyte
Alas howe longe shalt thou thy wyt haue blynde
Here my preceptis and rote them in thy mynde
Nowe is full tyme and season to clere thy syght:
Harkyn to my wordes, grounde of goodnes and ryght

Lerne mortall men, stodyenge day and nyght
To knowe me wysdome, chefe rote of chastyte
My holy doctryne thy herte shall clere and lyght
My tunge shall shewe the ryght and equyte
Chase out thy foly, cause of aduersyte.
And seke me wysdome whiche shall endewe thy mynde
With helth and welth wherby thou lyfe shalt fynde

Aryse I say agayne to the mankynde
And seke me wysdome that am well of goodnes
Let nat this worlde thy conscyence farther blynde
Nor to synne subdue for loue of false rychesse
Blynde nat thy herte with mondayne wretchednes
I am worth golde and worth all good mundayne:
And to mankynde counselloure souerayne

No maner Jowell is to me lyke certayne
Ne so profytable to mortall creature
I passe all ryches and cause a man refrayne
His mynde from synne, and of his ende be sure
There is no treasoure nor precious stone so pure
Carbuncle Ruby ne adamond in londe nor see
Nor other lapydary comparable to me:

And shortly to speke wysdome is more laudable
Than all the worlde or other thynge mundayne
There is no treasoure: to wysdome comparable
But it alone is a vertue moste souerayne
Hauynge nought lyke in valoure nor worth certayne
No fole is so ryche, nor hye of dignyte
But that a wyse man pore is more worthy than he

Wysdome preserueth men in auctoryte
Prynces promotynge by counseyll prouydent
By it pore men somtyme, and of lowe degre
Hath had the hole worlde to them obedyent
It gydeth Cytees and countrees excellent
And gouerneth the counseyll of prynce lorde and kynge
Strengthynge the body the herte enlumynynge

It gydyth lordes and from bondage doth brynge
Them whome foly hath brought in to captyuyte
Hir gyftys to mankynde frely offrynge
Gydynge hir discyples from all aduersyte
Wysdome stondynge vpon a stage on hye
Cryeth to mankynde with lowde voyce in this wyse
I trouth exalte: and vycious men dispyse

Lerne of me wysdome cast out your couetyse
For by my myght craft and wyse prouysicion
Kynges vnto their dygnyte dothe ryse
Theyr septers gydynge by my monycion
I gaue them lawes to gyde eche regyon
In welthe defendynge and in prosperyte
Them and theyr royalmes whyle they gyde them by me

All maner nacyons that doth to me inclyne
I gyde and gouerne by lawe and equyte
In me is right, godly wyt and doctryne
What blynde foly, and howe great aduersyte
Do they auoyde that gyde them selfe by me
And he that me louyth with worshyp and honour
Shall knowe my loue my grace and my fauour

He that me folowyth shall auoyde all dolour
I shall hym folowe promotynge in suche case
That none shall be before hym in valour
I godly ryches in my power inbrace
Whiche man by me may esely purchase
And he that wyll his way by me addresse
I shall rewarde with heuenly ioy endles

The father of heuen of infynyte goodnesse.
Me comprehendyth within his deytee
Of hym my firste begynnynge is doutles.
And heuen and erth he create hath by me
And euery creature bothe on londe and se
The heuen imperyall all planetis and firmameut
God neuer thynge made without my true assent

Therfore mankynde set thy mynde and intent
To me wysdome to be subiect and seruaunt
To my preceptis be thou obedyent
And heuenly ioy thou shalt nat lacke nor want
For doutles they ar mad and ignoraunt
And folys blyndyd who so euer they be
That wyll nat gladly be seruauntes vnto me

THE ENVOY OF BARKLAY TO THE FOLYS.

Aryse folys of myndes darke and blynde.
Receyue the gyftes of godly sapyence
Here hir perceptis and plant them in your mynde
And rote out the gaffys of your olde offence.
Call to your myndes what inconuenyence
Howe sodayne fallys, what sorowe and turment
Hath come to many a myghty lorde and prynce
For nat folowynge of hir commaundement.

* * * * *

Of bostynge or hauynge confydence in fortune.

Amonge our folys he ought to haue a place
And so he shall for it is resonable
Whiche thynketh hymselfe greatly in fortunes grace
Bostynge that she to hym is fauorable
As if hyr maner were nat to be mutable
In this vayne hope suche theyr lyfe doth lede
Tyll at the laste theyr hous borne oure theyr hede

He shakyth boost and oft doth hym auaunte
Of fortunes fauoure and his prosperyte
Whiche suffreth hym nought of his wyll to wante
So that he knoweth nought of aduersyte
Nor mysfortune nor what thynge is pouertee.
O lawles fole, o man blyndyd of mynde
Say what suretye in fortune canst thou fynde

To what ende or vnto what conclusyon
Shall fortune frayle vnrightwyse and vnsure
Lede the blynde fole by hyr abusyon.
Howe darest thou the in hir blyndnes assure.
Syns she vnstable is and can nat longe endure
Hir gyftis changith, she is blynde and sodayne
Thoughe she firste lawghe hir ende is vncertayne.

Thou shakest boste ofte of hir foly in vayne
For he is most happy whiche can auoyde hir snare
If she exalte some one vnto welth mundayne
She bryngeth another to payne sorowe and care
Whyle one is ladyd to the others backe is bare
Whyle she a begger maketh in good abounde
A lorde or state she throweth to the grounde

But nat withstandynge hir mutabylyte.
Thou bostest thy gode and to moche abundaunce
Thou bostest thy welth and thy prosperyte
Thy good auenturs, and plentyfull pleasaunce
Alas blynde fole amende thy ygnoraunce
And in thy welthe to this saynge intende
That fortune euer hath an incertayne ende

Fals fortune infect of countenaunce and of face
By hir iyen clowdy and varyable vysage
Hath many for a whyle taken to hir grace
Whiche after by hir whele vnstable and volage
Hath brought them to wo mysfortune and damage
She ruleth pore and riche without difference
Lewdnes exaltynge and damnynge innocence

Thus is that man voyde, of all intellygence
Whom fortune fedyth, with chaunche fortunable
If he therin haue ouer large confydence
And thynke that sure that euer is mutable
That fole is sonne, to the fende abhomynable
That foloweth ryches, and fortune that is blynde
His sauyour lefte, and clene out of mynde

Whan the foule fende, father of vnhappynes
Pore man purposyth by falshode to begyle
He sendeth hym welth worldly, and fals ryches
And causeth fortune, awhyle on hym to smyle
Whiche with hir blyndenes doth mankynde so defyle
That whyle they trust in hir fauour to sore.
They damme theyr soules in hell for euermore

By large examples thou eche day mayste se
The chaunge of fortune and the ende vncertayne
Wherfore to boste the of hyr commodyte
It is great foly and also thynge in vayne
From this lewdnes thy mynde therfore refrayne
And be content with fortune moderate
Nor boste the nat of thy welth or estate

This day thou art ryche and despysest the pore
Yet so may it fall, that for thy lewde lyuynge
To morowe thou beggest thy brede from dore to dore
Therfore remembre that blynde fortune wandrynge
Hath nat in hyr handes power, nor gydynge
The rewardes of welth, nor of felycyte
But god them gydeth by his great maieste

And all thynge chaungeth as is to hym plesaunt
His dedes to wysdome alwaye agreable
Wherfore blynde fole be nat so ignoraunt
To prayse fortune whiche is so varyable
And of rewardes vnsure and chaungeable
But thoughe she smyle trust nat to hir intent
For amonge swete herbes ofte lurkyth the serpent

BARKLAY TO THE FOLYS.

Ye folys that haue in fortune confydence:
And boste you of welth and of prosperyte
Leue of your foly, and note by euydence:
Hir cours vnsure: and hir mutabylyte
None in this lyfe can byde in one degre
But somtyme hye, than after pore and lowe.
Nowe nought set by, nowe in auctoryte
Nowe full nowe voyde as waters ebbe and flowe

I am remembred that I haue often sene
Great worldly ryches ende in pouertye
And many one that hath in fauour ben:
And hye promotyd in welth and dignyte.
Hath sodaynly fallyn into calamyte
Thus is it foly to trust in fortunes grace
For whyle the Se floweth and is at Burdews hye
It as fast ebbeth at some other place

* * * * *

Of the ouer great and chargeable curyosyte of men.

He that wyll coueyt to bere more than he may
And take on his sholders more than he can sustayne
Suche is a fole, his dedys wyll not deny
And with his owne wyll gooth to peryll and payne.
He is vnwyse whiche is ioyous and fayne
To offer his necke to bere that without fere
Whiche were ynoughe for dyuers men to bere

That man that taketh vpon his backe alone
The heuy weght of the large fyrmament
Or any burdeyne whiche maketh hym to grone
Whiche to sustayne his strength is ympotent
No meruayle is if he fall incontynent
And than whan he lowe on the grounde doth lye
He oft repentyth his purpose and foly

We haue in storyes many examples great
Shewynge the lewde ende of this curyosyte.
I rede of Alexander that dyd often sweate
In great peryls to augment his dignyte
He was nat content with europe and asye
Nor all the grounde under the fyrmament
At the last ende, cowde nat his mynde content

As if all the erth were nat suffycyent
For his small body by curyouse couetyse
But at the last he must holde hym content
With a small cheste, and graue nat of great pryce.
Thus deth vs shewyth what thynge sholde vs suffyce
And what is the ende of our curyosyte.
For dethe is lyke to hye and lowde degre

What shall a kynge at his last endynge haue
Of all his realme and infynyte treasoure
Saue onely his towmbe, and the grounde of his graue
But thoughe it be of great pryce and voloure
As is conuenyent to his hye honoure.
Yet lytell conforte to his soule shall it gyue
But cause of bostynge to them that after lyue

Thus whan man vnto his last ende is come
He nought with hym bereth of his dignytees
Wherfore cynicus a man of great wysdome
Lorde grettest of Grece in londes and Cytees
Hathe lefte great example vnto all degrees
For his great ryches his herte dyd neuer blynde
But worldly pompe set clene out of his mynde

He forced of no castels nor excellent byldynge
Dispysynge charges and besynes worldly
But gaue his mynde to vertue and cunnynge
And namely to the scyence of astronomy
Consyderynge that great rest of mynde and of body
With hym abydeth whiche with bolde herte is fayne
To folowe vertue, and leue charges mundayne

He that so doth no weght doth vndertake
Vpon his backe of so great a grauyte
That his small strength must it agayne forsake.
Where he that attempteth grettest thynges, and hye:
Great weyght of charges and moche dignite
Must lerne to suffer payne thought and vexacion
By his great charges of perturbacion.

What auayle is it the worlde to obtayne
In one mannys power, and all other to excell
To suffer trouble, and vayne charges sustayne
And at the last his pore soule gooth to hell
There toren and tourmented in paynes cruell
It were moche better to kepe a quyet mynde
And after our deth eternall rest to fynde

He that taketh thought for euery besynes:
And caryth for that whiche doth nat apertayne
Nor longe to his charge, he is full of blyndnes
And no houre shall rest, but styll in thought and payne
Care for thy owne charges, theron set thy brayne
For he a fole is that caryth or doth intende
For another mannys charge whiche he can nat amende

Therfore lyue in rest after thy degre.
Nor on suche thynges do nat thy mynde aply
Whiche ar no thynge apertaynynge vnto the
If thou so do thou shalt fynde rest therby
Auoyde thou the charge of worldly mysery
For godes take no thought great care ne trauayle.
Whiche after deth shall do the none auayle

BARKLAY TO THE FOLYS.

Fole clere thy iyen and of thy selfe beware
Care moste for thy owne besynes and charge
For other mennes take no great thought nor care
If thou thy conscience mayst therof discharge
A curyous man that of his tunge is large
Talkynge or carynge of other, his place is best
Hye in the fore top of our folysshe barge
For in that place is small quyet or rest

* * * * *

Of them that ar alway borowynge.