Chapter XIX

[A] "Bot your gordel," quod G: "God yow for-3elde!
Þat wyl I welde wyth good wylle, not for þe wynne golde,
Ne þe saynt, ne þe sylk, ne þe syde pendaundes,
2432 For wele, ne for worchyp, ne for þe wlonk werkke3,
[B] Bot in syngne of my surfet I schal se hit ofte;
When I ride in renoun, remorde to myseluen
Þe faut & þe fayntyse of þe flesche crabbed,
2436 How tender hit is to entyse teches of fylþe;
[C] & þus, quen pryde schal me pryk, for prowes of armes,
[D] Þe loke to þis luf lace schal leþe my hert.
Bot on I wolde yow pray, displeses yow neuer;
2440 Syn 3e be lorde of þe 3onde[r] londe, þer I haf lent inne,
Wyth yow wyth worschyp,--þe wy3e hit yow 3elde
Þat vp-halde3 þe heuen, & on hy3 sitte3,--
[E] How norne 3e yowre ry3t nome, & þenne no more?"
2444 "Þat schal I telle þe trwly," quod þat oþer þenne,
[F] "Bernlak de Hautdesert I hat in þis londe,
Þur3 my3t of Morgne la Faye, þat in my hous lenges,
&[1] koyntyse of clergye, bi craftes wel lerned,
2448 Þe maystres of Merlyn, mony ho[2] taken;
For ho hat3 dalt drwry ful dere sum tyme,
With þat conable klerk, þat knowes alle your kny3te3
at hame;
2452 Morgne þe goddes,
Þer-fore hit is hir name;
[G] Welde3 non so hy3e hawtesse,
Þat ho ne con make ful tame.

[Sidenote A: But God reward you for your girdle.] [Sidenote B: I will wear it in remembrance of my fault.] [Sidenote C: And when pride shall prick me,] [Sidenote D: a look to this lace shall abate it.] [Sidenote E: But tell me your right name and I shall have done."] [Sidenote F: The Green Knight replies, "I am called Bernlak de Hautdesert, through might of Morgain la Fey, the pupil of Merlin.] [Sidenote G: She can tame even the haughtiest.] [Footnote 1: in (?).] [Footnote 2: ho hat3 (?).]