Chapter XIII

[A] Schalke3 to schote at hym schowen to þenne,
Haled to hym of her arewe3, hitten hym oft;
1456 Bot þe poynte3 payred at þe pyth þat py3t in his schelde3,
& þe barbe3 of his browe bite non wolde,
[B] Þa3 þe schauen schaft schyndered in pece3,
Þe hede hypped a3ayn, were-so-euer hit hitte;
1460 [C] Bot quon þe dynte3 hym dered of her dry3e stroke3,
Þen, brayn-wod for bate, on burne3 he rase3,
[D] Hurte3 hem ful heterly þer he forth hy3e3,
& mony ar3ed þerat, & on-lyte dro3en.
1464 Bot þe lorde on a ly3t horce launces hym after,
[E] As burne bolde vpon bent his bugle he blowe3,
He rechated, & r[ode][1] þur3 rone3 ful þyk,
Suande þis wy[ld]e swyn til þe sunne schafted.
1468 [F] Þis day wyth þis ilk dede þay dryuen on þis wyse,
Whyle oure luflych lede lys in his bedde,
[G] Gawayn grayþely at home, in gere3 ful ryche
of hewe;
1472 Þe lady no3t for3ate,
Com to hym to salue,
Ful erly ho wat3 hym ate,
His mode forto remwe.

[Sidenote A: The bowmen send their arrows after this wild swine,] [Sidenote B: but they glide off shivered in pieces.] [Sidenote C: Enraged with the blows,] [Sidenote D: he attacks the hunters.] [Sidenote E: The lord of the land blows his bugle,] [Sidenote F: and pursues the boar.] [Sidenote G: All this time Gawayne lies a-bed.] [Footnote 1: The MS. is here almost illegible.]