Chapter XV

1508 [A] "I woled[1] wyt at yow, wy3e," þat worþy þer sayde,
"& yow wrathed not þer-wyth, what were þe skylle,
Þat so 3ong & so 3epe, as 3e [ar] at þis tyme,
So cortayse, so kny3tyly, as 3e ar knowen oute,
1512 [B] & of alle cheualry to chose, þe chef þyng a-losed,
Is[2] þe lel layk of luf, þe lettrure of armes;
F[or] to telle of þis tenelyng of þis trwe kny3te3,
Hit is þe tytelet, token, & tyxt of her werkke3,
1516 How le[des] for her lele luf hor lyue3 han auntered,
Endured for her drury dulful stounde3,
& after wenged with her walour & voyded her care,
[C] & bro3t blysse in-to boure, with bountees hor awen.
1520 & 3e ar kny3t com-lokest kyd of your elde,
Your worde & your worchip walke3 ay quere, [Fol. 111b.]
& I haf seten by your-self here sere twyes,
[D] 3et herde I neuer of your hed helde no worde3
1524 Þat euer longed to luf, lasse ne more;
[E] & 3e, þat ar so cortays & coynt of your hetes,
Oghe to a 3onke þynk 3ern to schewe,
& teche sum tokene3 of trweluf craftes.
1528 Why ar 3e lewed, þat alle þe los welde3,
Oþer elles 3e demen me to dille, your dalyaunce to herken?
for schame!
I com hider sengel, & sitte,
1532 To lerne at yow sum game,
[F] Dos, teche3 me of your wytte,
Whil my lorde is fro hame."

[Sidenote A: "I would learn," she says, "why you, who are so young and active,] [Sidenote B: so skilled in the true sport of love,] [Sidenote C: and so renowned a knight,] [Sidenote D: have never talked to me of love.] [Sidenote E: You ought to show a young thing like me some token of 'true-love's crafts.'] [Sidenote F: So teach me of your 'wit' while my lord is from home."] [Footnote 1: wolde (?).] [Footnote 2: In (?).]