Chapter XX

2456 [A] Ho wayned me vpon þis wyse to your wynne halle,
For to assay þe surquidre, 3if hit soth were,
Þat rennes of þe grete renoun of þe Rounde Table;
Ho wayned me þis wonder, your wytte3 to reue,
2460 [B] For to haf greued Gaynour, & gart hir to dy3e. [Fol. 124.]
With gopnyng[1] of þat ilke gomen, þat gostlych speked,
With his hede in his honde, bifore þe hy3e table.
Þat is ho þat is at home, þe auncian lady;
2464 [C] Ho is euen þyn aunt, Arþure3 half suster,
Þe duches do3ter of Tyntagelle, þat dere Vter after
[D] Hade Arþur vpon, þat aþel is nowþe.
Þerfore I eþe þe, haþel, to com to þy naunt,
2468 Make myry in my hous, my meny þe louies,
& I wol þe as wel, wy3e, bi my faythe,
As any gome vnder God, for þy grete trauþe."
[E] & he nikked hym naye, he nolde bi no wayes;
2472 Þay acolen & kyssen, [bikennen] ayþer oþer
To þe prynce of paradise, & parten ry3t þere,
on coolde;
[F] Gawayn on blonk ful bene,
2476 To þe kynge3 bur3 buske3 bolde,
& þe kny3t in þe enker grene,
Whider-warde so euer he wolde.

[Sidenote A: It was she who caused me to test the renown of the Round Table,] [Sidenote B: hoping to grieve Guenever and cause her death through fear.] [Sidenote C: She is even thine aunt.] [Sidenote D: Therefore come to her and make merry in my house."] [Sidenote E: Gawayne refuses to return with the Green Knight.] [Sidenote F: On horse full fair he bends to Arthur's hall.] [Footnote 1: glopnyng (?).]