Chapter XXV

[A] In dre3 droupyng of dreme draueled þat noble,
As mon þat wat3 in mornyng of mony þro þo3tes,
1752 How þat destiné schulde þat day [dy3t] his wyrde,
At þe grene chapel, when he þe gome metes,
& bi-houes his buffet abide, with-oute debate more;
[B] Bot quen þat comly he keuered his wyttes,
1756 Swenges out of þe sweuenes, & sware3 with hast.
Þe lady luflych com la3ande swete,
[C] Felle ouer his fayre face, & fetly him kyssed;
He welcume3 hir worþily, with a wale chere;
1760 He se3 hir so glorious, & gayly atyred,
So fautles of hir fetures, & of so fyne hewes,
[D] Wi3t wallande Ioye warmed his hert;
With smoþe smylyng & smolt þay smeten in-to merþe,
1764 Þat al wat3 blis & bonchef, þat breke hem bi-twene,
& wynne,
Þay lanced wordes gode,
Much wele þen wat3 þer-inne,
1768 [E] Gret perile bi-twene hem stod,
Nif mare of hir kny3t mynne.

[Sidenote A: The knight was then dreaming of his forthcoming adventure at the Green Chapel.] [Sidenote B: He awakes and speaks to his fair visitor,] [Sidenote C: who sweetly kisses him.] [Sidenote D: Great joy warms the heart of Sir Gawayne,] [Sidenote E: and "great peril between them stood."]