Chapter XXVII

1792 "Þat is a worde," quod þat wy3t, "þat worst is of alle,
Bot I am swared for soþe, þat sore me þinkke3;
[A] Kysse me now coraly, & I schal cach heþen,
I may bot mourne vpon molde, as may þat much louyes."
1796 Sykande ho swe3e doun, & semly hym kyssed,
& siþen ho seueres hym fro, & says as ho stondes,
"Now, dere, at þis de-partyng, do me þis ese,
[B] Gif me sumquat of þy gifte, þi gloue if[1] hit were,
1800 [C] Þat I may mynne on þe mon, my mournyng to lassen."
"Now Iwysse," quod þat wy3e, "I wolde I hade here
Þe leuest þing for þy luf, þat I in londe welde,
[D] For 3e haf deserued, forsoþe, sellyly ofte
1804 More rewarde bi resoun, þen I reche my3t,
Bot to dele yow for drurye, þat dawed bot neked;
Hit is not your honour to haf at þis tyme
A gloue for a garysoun, of Gawayne3 gifte3,
1808 & I am here [on] an erande in erde3 vncouþe,
[E] & haue no men wyth no male3, with menskful þinge3;
Þat mislyke3 me, ladé, for luf at þis tyme,[2]
Iche tolke mon do as he is tan, tas to non ille,
1812 ne pine."
[F] "Nay, hende of hy3e honours,"
Quod þat lufsum vnder lyne,
[G] "Þa3 I hade o3t[3] of youre3,
1816 3et schulde 3e haue of myne."

[Sidenote A: She then kisses him, sighing for sorrow.] [Sidenote B: She desires some gift,] [Sidenote C: by which to remember him.] [Sidenote D: Gawayne tells her that she is worthy of a better gift than he can bestow.] [Sidenote E: He has no men with mails containing precious things.] [Sidenote F: Then says that lovesome,] [Sidenote G: "Though I had nought of yours, yet should ye have of mine."] [Footnote 1: of, in MS.] [Footnote 2: tyne, in MS.] [Footnote 3: no3t (?).]