Chapter V: Off Stipendis and Expensses Necessarie

_Item_, We think expedient, that the Universiteis be doted with temporall landis, with rentis and revenewis of the Bischopriks temporalitie, and of the Kirkis Collegiat, sa far as thair ordinarie chargeis shall require; and thairfore, that it wald please your Honouris, be advise of your Honouris Counsall and voit of Parliament, to do the samin. And to the effect the same may be schortlie expediat, we have recollected the soumes we think necessarie for the samin.

_Imprimis_, For the ordinarie Stipend of the Dialecticiane Reidar, the Mathematiciane, Phisitiane, and Morall Philosophie, we think sufficient ane hundreth pundis for everie ane of thame.

_Item_, For the Stipend of everie Reader in Medicine and Lawis, ane hundreth threttie thre pundis, vi s. viij d.

_Item_, To everie Reidar in Hebrew, Greik, and Divinitie, twa hundreth pundis.

_Item_, To everie Principall of a Colledge, ij lb.

_Item_, To everie Stewart, sextene pundis of fie.

_Item_, To everie Gardnar, to everie Cuke, and Portar, ilkane, ten markis.

_Item_, To the Burde of everie Bursar, without the Classes of
Theologie and Medicine,[486] twenty pundis.

_Item_, [To every Bursar] in the Classe of Theologie, whiche
will be onlie twelf personis in Sanctandrois, 24 lib.

Summa of yeirlie and ordinarie expensses in
the Universitie of Sanctandrois, extendis to 3796 lib.

Summa of yearlie and ordinarie expensis of
Glasgow,[487] 2922 lib.

Abirdene, alsmekill, 2922 lib.
---------
Summa of the Ordinarie Chargis of the hoill, 9640 lib.

[486] In edit. 1621, the words, "and Medicine" are omitted.

[487] The Editor in 1722, remarks, "The ordinary expenses of Glasgow
or Aberdeen extend only to 2722 Pounds and one Merk, so that probably
it was designed that these two Universities should have had each of
them a Professor of Greek, whose salary was to have been 200 Pounds."

_Item_, the Beddellis Stipend shalbe of everie entrant and suppost of the Universitie, ii. schillingis; off everie ane graduat in Philosophie, thre schillingis; off everie ane graduat in Medicine or Lawis, 4 schillingis; in Theologie, 5 schillingis; all Bursis being exceptit.

_Item_, We have thocht gude for building and uphald of the placis, ane general collect be maid; and that everie Erlis sone, at his entre to the Universitie, shall gif fourtye schillingis, and sicklike at everie graduatioun, 40 schillingis. _Item_, Everie Lordis sone sicklike at ilk tyme, 30 schillingis; ilk fre halding Baronis sone, twentye schillingis: everie Fewar and substantious Gentilmannis sone, ane mark. _Item_, Everie substantious Husband and Burges sone, at ilk tyme, ten schillingis: _Item_, Everie ane of the rest, (excepting[488] the Bursaris,) 5 schillingis at ilk tyme.

[488] In edit. 1621, "not excepting."

And that this be gathered in ane commoun box, put in keiping to the Principall of the Theologeanes, everie Principall havand ane key thairof, to be comptit ilk yeare anis, with the relictis of the Principallis to be layed into the samin, about the fivetene day of November, in presence of the Superintendent, Rectour, and the hoill Principallis; and, at thair hoill consent, or at the least the most part thairof, reservit and employit onlie upoun the building and uphalding of the placis, and repairing of the same, as ever necessitie shall require. And thairfore, the Rectour with his assistance shall be haldin to visite the placis ilk yeir anis, incontinent efter he be promoted, upoun the last of October, or thairby.