Chapter XXXV: Appendix: XV

[P. 354, n. 4]

STATE PAPERS, FOREIGN

ELIZABETH, VOL. C, NO. 1,862

[_Catholic League in Maine_]

Nous soubsignez confederez et alliez par saincte et divine alliance pour la continuation et maintention de lhonneur souverain deu a notre Dieu le createur et aux commandementz & ordonnances de la saincte eglise catholique apostolique & romaine et pour la maintention de lestat du Roy treschrestien et trescatholique, notre souverain prince esleu & a nous baille par la grace et providence divine pour notre chef & souverain terrien debateur & conservateur de lad. eglise catholique & romaine et des sainctz decretz & concilies dicelle, et de lobeissance que nous et tous ses bons subiectz luy devons et a noz seigneurs ses freres aussi treschrestiens & trescatholiques, repoz de son Royaume & de tout son peuple Et afin de maintenir lad. eglise et religion catholique apostolique & romaine pour obvier par tous moyens licites raisonnables et permis de Dieu aux damnees entreprinses machinations et conspirations que Sathan a mys es cueurs daucuns malheureux qui ont tendu & tendent par tout lesd. artz dyaboliques de non seulement imminer mais du tout subvertir lad. religion catholique apostolique & romaine et lestat & auctorite du Roy notre bon souverain catholique et treschrestien Prince & legitime defenseur dicelle et de nosd. s^[rs] ses freres, et pour tenir moyennant layde de Dieu et le consentement & accord de leurs ma^[tes] tout le peuple en repoz Pour servir a Dieu & a notre mere saincte eglise et rendre lobeissance deue a leurs Ma^[tes], faire obeir la justice tant de ses courtz de parlementz que autres ses juges magistratz, Promettons et jurons vivre et mourir en lad. religion catholique apostolique & Romaine et lobeissance deue ausd. Ma^[tes] et a leur justice Nous promettons aussi & jurons ensemble toute obeissance service et ayde et de noz personnes & biens pour empescher & courir sus avec leurs auctoritez contre tous perturbateurs innovateurs et contrevenantz a lad. religion; en estats desd. ma^[tes] & a leurs sainctz & catholiques edictz & ordonnances divines & polytiques et de nous secourir les ungs les autres aux effectz susd. par tous moyens contre tous rebelles heretiques sectaires de la nouvelle religion en quelque lieu quilz soient & qui en sont suspectz ou nadherentz a notre party et tendans a fins contraires. Le tout jusques a la mort inclusivement. Le xj^[e] Iuillet 1568.

Depuis ces presentes signees par la noblesse mercredy dernier elles furent signees en cahier distinct toutesfois en mesme livre par les presbytres. Et vendredy portees par lesd. presbytres auturs estat Et y ont soubsigne les eschevins & procureurs de la ville plusieurs des officiers du Roy et des bourgeois avec menasses a ceulx qui nont voulu signer destre tenuz suspectz. Et par la conference quils ont eue tous ensemble, la noblesse sest chargee du reiglement pour assembler et dresser les gens de guerre et ceulx qui peuvent porter les armes et dadviser et eslire les chefz pour leur communte. Et les presbytres et le tiers estat sen sont de tout submys a la noblesse. Ils font signer & jurer par les bourgades aux procureurs & plus apparentz des parroisses.

Lesgail sest faict en la ville du Mans pour la solde des harquebuziers a cheval pour mons^[r] le seneschal de Maine. Et ayant a son arrivee trouve les portes assez mal gardies a faict publier la garde avec injunction des peynes.

[_Not signed_]

[_Endorsed_] Copie de lassociation faicte | par les provinces.

STATE PAPERS, FOREIGN

ELIZABETH, VOL. C, NO. 1,863

Cest le Roole de la saincte union contenant quarante rooles en parchemin cestluy compris.

Nous soubsignez confederez & alliez par saincte et divine aliance es Duché Canton et Conté du Maine, pour la continution et manutention de l’honneur deu a Dieu notre createur, de ses sainctz comandementz, et ordonnances de la saincte Eglise catholicque, apostolicque et Romaine: Et pour la manutention de lestat du Roy treschrestien et trescatholicque notre Souverain Prince, esleu et a nous baille par la grace et providence divine pour notre Chef et Souverain terrien dominateur et conservate^[r] de lad. saincte Eglise Catholicque, Apostolicque et Romaine, et des sainctz decretz et conciles d’icelle, et de lobeyssance que nous et tous ses bons subiectz luy debuons, et a tous nos Seigneurs ses freres aussy treschrestiens et trescatholicques Princes, repos de son Royaume, et de tout son peuple: Et afin de maintenir lad. s^[te] eglise et Religion catholicque, Apostolique et Romaine, po^[r] obvier par tous moyens licites raisonnables et permis de Dieu, aux damnees entreprinses, machinations et conspirations que Sathan a mises es cueurs d’aucuns malheureux qui ont tendu et tendent par tous artz diaboliques de non seulement imminuer mais du tout subvertir lad. Religion catholique; Prince treschrestien et legitime defenseur, et de nosd. Sieurs ses freres. Et pour tenir moyennant layde de Dieu, consentement et accord de leurs maiestez, tout le peuple en repos pour servir a Dieu et rendre lobeyssance deue a leursd^[es] maiestes, faire obeyr la justice, tant de ses Cours de parlement que aultres des juges et magistratz. Promettons et jurons vivre et mourir en lad^[e] Religion Catholique Apostolique et Romaine et obeyssance deue ausd^[es] Maiestes Ausquelles Maiestez et Iustice nous promettons et jurons toute obeyssance, secours, et ayde, et de nos personnes empescher et courir sus, aveq leurs authoritez, a tous perturbateurs, innovateurs, et contrevenants a lad. Religion, et Estatz desd^[es] Maiestez, et a leurs sainctz et catholiques Edictz, et ordonnances divines et politiques: Et nous secourir les uns les autres aux effectz susd^[es] par tous moyens contre tous rebelles, heretiques, sectaires tendantz a fin contraires. Le tout jusques a la mort inclusivement. Faict et arresté au Mans lunz^[me] jour de Iullet 1568.

[_Not signed_]

[_Endorsed in Cecil’s hand_]

Copy of a Conspyracion by | vow, in France by the | Catholicques
ag. the contraryes.