Chapter LII: Appendix: XXXIII

[P. 474, n. 2]

BIBLIOTHEQUE D L’INSTITUT, COLLECTION GODEFROY

VOL. 256, FO. 83 RECTO, NO. 45 DU CATALOGUE

[_Le duc d’Anjou à Charles IX_][1781]

[Camp devant La Rochelle, 17 février 1573].[1782]

Monseigneur. Par le jeune Seguier que j’ay depesché depuis deux jours devers Vostre Majesté, elle aura entendu comme j’estois sur le poinct envoyer devers icelle le S^[r] de Bourrique, l’un de mes maistres d’hostelz, pour la sattisfaire de tout ce que je pouvois avoir à luy faire entendre de l’estat de ceste armée. Suivant ce, je l’ay presantement faict partir si bien instruict de touttes choses que je ne doubte qu’il ne luy en sçache rendre très bon compte. Me restera à supplier, comme je fais très humblement, Vostre Majesté le voulloir en ce qu’il vous dira de ma part oyr avec la mesme foy et creance dont elle a tousjours voullu m’honnorer. J’ay veu ce qu’il luy a pleu me mander par sa depesche du XI^[me] de ce mois sur la proposition que aucuns avoient faicte de donner la charge de vostre armée de mer à mon frere Mons^[r] le Duc et au Roy de Navarre chose que je rejectay aussi tost pour les mesmes considérations, que Vostredicte Majesté a bien sceu prendre, et n’estois pour le permectre en aucune sorte, de maniere que Vostredicte Majesté demourera, s’il luy plaist, en repos de ce cousté la.

Monseigneur, je supplie le Createur donner à Vostredicte Majesté en très bonne santé et prosperité tres longue et tres heureuse vye.

Escript au camp devant La Rochelle, le XVII^[me] jour de febvrier 1573.

* * * * *

Monseigneur, j’ay veu par les dernieres depesches qui vous sont venues d’Angleterre de S^[r] de La Mothe Fenellon, la demonstration que ceulx de vos subiectz qui sont refugiez par dela font de procurer de leur part l’entier repos de vostre royaume avec ceulx de leur religion. Chose qui me semble estre très avantageuse au bien de vostre service, et que, pour l’effect de leur bonne intention, il vous plaise leur bailler touttes les seuretez necessaires pour venir par deça. Estant ceste voye, si elle peult proffiter, beaucoup plus aisée et seure que celle de la force, outre le moien que ce vous seroit de conserver beaucoup de voz bons subiectz et serviteurs et soulaiger d’autant vostre bourse.[1783]

[_Propria manu_] Vostre treshumble et tres obeissant frere et subget

HENRY.

[_Au dos, Suscription_] Au Roy, Monseigneur et frere.

[_Au dos, alia manu_] Monseigneur, du XVII^[me] febrier. M^[r] de Bourricques.

[Original]